ЯҢАЛЫКЛАР

Узган ел районда 11 пар чит ил граҗданы никахларын теркәгән. Бәлки, шул рәвешле Россия граҗданлыгы алуны хәл итәләрдер, дияргә нигез юк икән – әлеге парларның берсе дә аерылышмаган. Быелның 4 аенда да 4 чит ил граҗданины ЗАГСта теркәлеп, гаилә корган.

Узган елдан бирле  нурлатлылар халык әйтеменә колак салмыйча, май аенда никахларын терки башлаганнар.
– Быел да май аенда 13 пар өйләнешергә гариза бирде,–ди ЗАГС бүлеге мөдире Гөлшат Евлахина. Аңлавыбызча, моны өлешчә алда торган Рамазан ае белән дә аңлаталар. Әмма шулай да быел өйләнешүчеләр саны узган елгыдан азрак икән.

Бүген Бөтендөнья хезмәтне саклау көне. Шул уңайдан Нурлат районы хуҗалыкларында производствода имгәнүләрне булдырмау һәм һөнәри авыруларны кисәтүгә юнәлдерелгән чаралар үткәрелә. 

Югары Нурлат микрорайонындагы 30 ел ремонт күрмәгән Билгесез солдат обелискы  9 май – Җиңү бәйрәменә яңартыла. Биредә Нурлат УТТсы хезмәткәрләре 10 көн дәвамында ремонт эшләре алып бара. Обелиск реставрацияләнгән, хәзер аның аскы өлешенә плитә түшәү һәм керү юлын ясау эшләре бара. Моннан тыш, бәйрәмгә кадәр  обелиск урнашкан мәдәният йорты бакчасына туфрак түшәү, агачлар утырту эшләре дә башкарылачак.

Бүген, 28 апрельдә, шәһәр Мәдәният сараенда Бөек Ватан сугышы ветераннары һәм аларның гаилә әгъзаларына Бердәм түләүсез юридик ярдәм күрсәтелде.

Югары Нурлат микрорайонында балалар бакчасын, башлангыч мәктәпне, ФАП, музей һәм спортзалны, ТОСны  бер түбә астына алган объект 10 июльгә үз ишекләрен ачачак. Бүген, 28 апрельдә район башлыгы Равил Кузюров әлеге бъектта булып ремонт эшләре белән танышты.

Быел районнан 6 фермер хуҗалыгы башлыгы “Гаилә фермаларын үстерү” программасы буенча конкурс сайлап алуында  катнашырга теләк белдергән. ТР авыл хуҗалыгы һәм азык-төлек министрлыгында исә конкурска заявкалар һәм документлар кабул итү 24 апрельдән старт алды һәм  21 майга кадәр дәвам итәчәк.