ЯҢАЛЫКЛАР

Кичә Нурлат шәһәре мәдәният сараенда якташыбыз, “Татар җыры–2010” яшь башкаручыларның телевизион конкурсы беренче премиясе һәм “Болгар радиосы” милли музыка премиясе лауреаты Сиринә Зәйнетдинова туган ягында беренче сольный концертын тәкъдим итте.

Нурлат районы  күрше районнар өчен тәрбиягә бала алган гаиләләргә ярдәм һәм консультация бирү буенча пилот проектына керә. Бу хакта 28 гыйнварда Чистай шәһәрендә ата-аналарсыз калган балаларны гаиләләргә урнаштыру белән шөгыльләнүче белгечләр өчен үткәрелгән республика семинарында хәбәр итәләр.

Бу атнада һава температурасы төшү белән район мәгариф учреждениеләрендә чәршәмбе, пәнҗешәмбе укулар үткәрелмәде. Мәгариф бүлегеннән хәбәр итүләренчә, мәктәпләр ТР Мәгариф һәм фән министрлыгы рекомендацияләрен истә тотып эш иткәннәр. Бу кагыйдәләр температура  -27 градустан түбән булганда – 1-9, -32дән төшсә – өлкән сыйныфлар укучыларына кагыла. Укучылар программадан артка калмаячак: педагоглар укучыларның барысына да биремнәрне дистанцион рәвештә җибәреп торганнар.

Гыйнварда ОРВИ белән медицина ярдәме сорап 26 кеше мөрәҗәгать иткән, шуларның 2се – балалар. Бу хакта кичә Роспотребнадзорда хәбәр иттеләр. Грипп очраклары әлегә теркәлмәгән. Әмма һава торышы җылыну һәм студентларның каникуллары башлану белән хәл үзгәрергә дә мөмкин, дип саныйлар медицина хезмәткәрләре.

Әмзә авыл җирлеге җыенында катнашучыларны авыл җирлеге эшчәнлегеннән бигрәк хуҗалыкның киләчәк язмышы борчыды. Авыл җирлеге башлыгы Алмаз Насыйбуллинның хисабыннан соң ук сүз шул темага күчте дә.

1 февральдән тракторларга, үзйөрешле машиналарга һәм аларның таккычларына техник караулар башлана. РФ Хөкүмәте Карары белән кабул ителгән Гостехнадзор органнарында теркәлгән үзйөрешле машиналарга  һәм башка төр техникага техник карау үткәрү Кагыйдәләрендә быел кайбер үзгәрешләр бар. Алар белән Гостехнадзор идарәсенең Нурлат бүлеге начальнигы Расих Сатдаров таныштыра.

Бүген, 30 гыйнварда Кычытканлы авылындагы гражданнар җыенында иң еш яңгыраган сораулар кышын авылда су белән проблемалар тууына, пай җирләре һәм җирле хуҗалыкта эшләүчеләрнең хезмәт хакларындагы тәртипкә кагылышлы иде.

Сишәмбе көнне үзәкләштерелгән бухгалтерия һәм финанс палатасы бухгалтерлары ата-ана кертемнәрен исәпләү һәм алар турындагы мәгълүматларны БАРС-бюджет системасына кертү  темасына багышланган укуларда булып кайттылар.

Шәһәр микрорайоннарында район җитәкчелеге һәм җаваплы службалар белән очрашуны 29 гыйнварда шикәрчеләр бистәсендәге җыен ачып җибәрде. Әлеге микрорайоннарда узган ел төзекләндерү һәм капиталь ремонт буенча башкарылган эшләр турында хисапны Нурлат шәһәре башкарма комитеты җитәкчесе вазыйфаларын башкаручы Илдар Зәйдуллин ясады.

“Шатлык” балалар бакчасы җитәкчелеге һәм хезмәткәрләре балалар бакчалары арасында үткәрелүче район конкурсы кысаларында территорияне матурайтып, балаларны кызыктырырлык әкият дөньясы булдырырга карар кылганнар иде.