Якын елларга өй эше бирелде

Шәһәр микрорайоннарында район җитәкчелеге һәм җаваплы службалар белән очрашуны 29 гыйнварда шикәрчеләр бистәсендәге җыен ачып җибәрде. Әлеге микрорайоннарда узган ел төзекләндерү һәм капиталь ремонт буенча башкарылган эшләр турында хисапны Нурлат шәһәре башкарма комитеты җитәкчесе вазыйфаларын башкаручы Илдар Зәйдуллин ясады. Микрорайондагы паркны төзекләндерү, Циолковский ур., 11 йортта балалар уен мәйданчыгы ясау, Тукай, Циолковский урамнарында, Безымянный тыкрыгында өлешчә юлларны тәртипкә китерү шул эшләр исемлегендә. Быел Тукай урамында юл ремонтын төгәлләү, мәчеттән Радужная урамына кадәр тыкрыкта юлны ремонтлау күздә тотыла. Әлеге микрорайон йортларына “ЭКОДОМ” ОООсы идарәче  компаниясе хезмәт күрсәтә, һәм аның җитәкчесе Илфат Гәрәевның җентекле чыгышы  компания эшен генә күрсәтеп калмады, халык белән ышанычлы мөнәсәбәт урнаштыру үрнәге  җәһәтеннән дә уңай мисал булды. 1800 кв. метрда проблемалы түбәләргә ремонт, подъездлар, йорт нигезләре, балкон һәм подъезд козырекларын тәртипләү, йортларга эскәмияләр ясату, су һәм канализация стоякларын алыштыру һәм тагы бик күп вак саналган, әмма тормыш өчен кирәкле эшләрнең байтагы халык үтенече буенча башкарылган.
Бу көнне дә ул район җитәкчелегенә 15 урам яктырткычы һәм балалар мәйданчыгы өчен 5 җиһаз комплекты сорап мөрәҗәгать итте.
– Мин халыкның һәр сүзен тыңларга һәм ишетергә тырышам, – диде соңрак микрорайон халкы мөнәбәбәтенең серен гади генә аңлатып.
Билгеле, сораулар да булды, һәм аларның күбесе урам юлларына, тротуарлар юклыгына кагыла иде. Шунда ук халыкны сөендерерлек саннар да китерелде: быел 29 мең кв.метрда төзекләндереләчәк йорт яны территорияләренең 13 мең кв. метры шикәрчеләр бистәсендә булачак. Урамнарны яктырту буенча хезмәт күрсәтүнең “Жилэнергосервис”ка күчүе шулай ук урам утлары белән проблеманың киеренкелеген киметер, дигән өмет калдырды. “Пчелка” балалар бакчасы капиталь ремонт планына кертелгән, электр күрсәткечләрен һәр айның 25 числосына тапшырырга кебек җаваплар сорау бирүчеләрне канәгатьләндерде. Катнашучыларны бистәдәге стадионның һәм Мәдәният йортының торышы да борчый булып чыкты. Район башлыгы Равил Кузюров шәһәрдә яңа стадион төзелүен һәм бусын да онытмаячакларын, ә Мәдәният йортында Халыклар Дуслыгы йорты булдыру турында сөйләшүләр алып барылуын хәбәр итте. Гомумән, район башлыгының чыгышы халыкның күп сорауларына ачыклык кертте. Халыкка торак-коммуналь хезмәт күрсәтүнең сыйфатына башка хокукый формадагы предприятие булдырып кына ирешергә мөмкин һәм бу уңайдан республикадан хуплау бар, диде ул алда торган зур бурычны билгеләп. Шикәр заводын саклау һәм яңабаштан заманча җиһазлау өчен инвестиция фондлары аша сөйләшүләр алып барылуын хәбәр итте. Бистәдә капиталь ремонт программасына кергән эшләрдән тыш юлларны, тортуарларны ремонтлау өчен өстәмә чыганаклар эзләргә туры киләчәген белдерде. Шунда ук ул криминаль хәлне катлауландыручылардан сорау кырыс булачагын да искәртте.
– Сөйләшү безнең өчен якын елларга өй эше бирде. Әлбәттә, барысын да тиз генә башкарып булмаячак, без тылсымчы түгел. Әмма эш алып барыла, беренче үзгәрешләр инде җәйгә көтеләчәк, – диде Равил Әфраимович сүзен йомгаклап.