ЯҢАЛЫКЛАР

Нурлат районы муниципаль хезмәткәрләре командасы традицион Спартакиадада III урын алып кайтты.

Район башкарма комитетының “Мәдәниятны үстерү үзәге” муниципаль бюджет идарәсе мәдәният учреждениеләре арасында ел башында  игълан иткән “Һәр торак пунктка – үрнәк мәдәният учреждениесе” конкурсының нәтиҗәләре билгеле.

Үз территорияләрен төзекләндерү, заманча бизәү, яшелләндерү, аны чисталыкта һәм тәртиптә тоту кебек шартлар куелган әлеге  конкурста Зирекле, Чулпан, Тимерлек мәдәният йортлары һәм Сосновка, Әхмәт авыллары клублары җиңүче булдылар.  

“Нурлат” ТРКсы республика журналистларының “Патриот” конкурсының “Мы–россияне” номинациясендә җиңү яулады. Конкурс шартлары буенча, аларның эше бәйгенең Россия этабында  да катнашачак.

Нурлат район мәдәният йорты каршындагы “Тулпар” шаяннар һәм тапкырлар клубы командасы татар ШТМКнарының  Сарманда 16 октябрьдә узачак зона бәйгесендә катнашачак. Быел ярыш “Агай-эне–ак мыек, бер-беребезне какмыек” дигән тема буенча барачак. 

Киекле авылыннан чыккан якташлар – Яр Чаллы шәһәренең “Жилэнергосервис” җәмгыяте генераль директоры Әхәт Галәветдинов Алабуга автозаводы директорының элеккеге урынбасары, хезмәт ветераны Роберт Вәлиев белән берлектә Киекле, Үрнәк авылларында яшәүче авылдашларын матур гамәлләре белән сөендерүләрен дәвам итәләр. 5 октябрь көнне ике авылдан барлыгы 100 кеше өчен алар мул табыннар артында Корбан ашы үткәргәннәр. Алар якташлары өчен Корбан ашын икенче ел рәттән зурлап уздыралар икән инде.