ЯҢАЛЫКЛАР

Бүген, 10 октябрьдә, район башлыгы каршында эшләүче дини һәм иҗтимагый оешмалар белән хезмәттәшлек берлеге “түгәрәк өстәл”гә җыелды.

Һәр көнне – 100ләп кеше. Нурлат районы күпфункцияле үзәгенә уртача шулкадәр кеше мөрәҗәгать итә. Үзәк директоры Татьяна Морозова әйтүенчә, иң күп мөрәҗәгатьләр җир мәсьәләсенә кагылышлы икән. Ә менә бер меңнән артык халкы булган авыллар өчен булдырылган ерагайтылган тәрәзә аша хезмәт күрсәтүне активлаштырасы бар әле, диде ул. Кызганычка каршы, авыл халкы бу уңайлыкның өстенлеген аңлап җиткерми бугай. 

Нурлат муниципаль районының күпфункцияле үзәге “Иң яхшы күпфункцияле үзәк” Бөтенроссия конкурсының республика этабында катнаша. Якын арада алар конкурс нәтиҗәләрен көтәләр.

Шушы көннәрдә Иске Әмзә клубында өч бәйрәмне – Өлкәннәр көнен, Корбан бәйрәмен һәм Укытучылар көнен берләштереп үткәрелгән чара кечкенә авылыбыз өчен зур вакыйга булды. Аны төп оештыручы – укытучы Флюра Шәйдуллина һәм клуб хезмәткәрләре кунакларның күңелен күрер өчен барын да эшләгән иделәр. Биредә коймаклар да пешерелде, табын да мул иде, ә Колбай Мораса авылы үзешчәннәре чыгышына кушылып үзебез дә җырламый түзә алмадык. Кичәнең матди ягын  авыл җирлеге башкарма комитеты күтәргән булса да, шундый тынгысыз җанлы оештыручылар булмаса, без игътибарсыз калган булыр идек бәлки. Шуңа рәхмәтнең иң олысын аларга юллап, бик күңелебез булып таралыштык.

Вәсилә Минапова

Бүген “DFM-Нурлат” радиосы үзенең 3 еллыгын бәйрәм итә. 

7 октябрьдән старт алган “Халык участковые-2014” Бөтенроссия конкурсының  икенче этабында район данын Россия МВДсының Нурлат районы буенча бүлеге өлкән уполномоченные, полиция капитаны Руслан Тәбрис улы Зәйнуллин яклый. 15 октябрьгә кадәр ТР Эчке эшләр министрлыгының “Сораштыру” бүлегенә кереп, якташыбыз, халык участковые Руслан Зәйнуллин өчен тавыш бирергә мөмкин. Тавыш бирү нәтиҗәләре буенча җиңү яулаган участок уполномоченные Татарстан Республикасын федераль дәрәҗәдә яклаячак.

Иртәгә, 10 октябрьдә, 13.00дә “Татар-информ” мәгълүмат агентлыгында “Россиянең иң яхшы укытучысы-2014”  бәйгесе җиңүчесе Алла Головенькина белән матбугат конференциясе узачак.

Сишәмбе көнне Авыл хуҗалыгы һәм эшкәртү сәнәгате хезмәтчәннәре көне уңаеннан үткәрелгән тантаналы чарада ТР Президенты Рөстәм Миннеханов “Сөләйманов Ә.И” КФХсының алдынгы комбайнчысы Владимир Никитинга “ТРның атказанган механизаторы” дигән мактаулы исемгә лаек булуы турында күкрәк билгесе тапшырды.