ЯҢАЛЫКЛАР

Кичә, 16 октябрьдә, Нурлатка эш визиты белән ТР Президентының парклар һәм скверлар буенча ярдәмчесе Наталия Фишман килде. Ул район башлыгы Равил Кузюров, үзенең командасы һәм районның башка җитәкчеләре белән шәһәрнең Сәлимҗанов урамындагы, Медведский исемендәге, яңа ачылган “Дуслык” скверларын, үзәк мәйдан, үзәк парк һәм Халыклар Дуслыгы йортын карады.

2015 ел мәгариф хезмәткәрләре профсоюзының республика комитеты тарафыннан хокукый белемнәр алу елы дип игълан ителгән иде. Шул уңайдан мәгариф хезмәткәрләре профсоюзының Нурлат оешмасы ел дәвамында мәгариф хезмәткәрләренең хокукый белемнәрен арттыруга юнәлдерелгән төрле чаралар үткәрә. 

Бүген район хуҗалыкларының техниканы кышкы саклауга кую һәм машина-трактор паркын техника ремонтына әзерлеген республика конкурсы кысаларында махсус комиссия тикшерде.

Һөнәри бәйрәмегез – Юл хуҗалыгы хезмәткәрләре көне белән ихлас котлаулар кабул итеп алыгыз. Сезнең көндәлек хезмәтегез ярдәмендә безнең юлларыбыз һәм урамнарыбыз күпкә уңайлы, җайлы һәм куркынычсызракка әйләнә бара. Быел гына да юл эшләре программасы буенча торак пунктларга кадәр 9 километр юл салынды, 14 километрдан артыграк юл, ике күпер ремонтланды.

Республика мәгариф хезмәткәрләренең иртәгә Мамадышта узачак җәйге Спартакиадасы финал этабында бездән 17 кешелек команда катнаша. Нурлатлылар җиңел атлетика эстафетасында, ераклыкка сикерүдә, бадминтон, армреслинг, канат тартышу һәм пневматик винтовкадан ату буенча көч сынашачак.

Елаур мәктәбендә “Дошколята” өстәмә мәгариф хезмәте күрсәтү түгәрәге 1 октябрьдән эшли башлаган. Тәҗрибәле педагог Татьяна Перепелкина алып бара торган әлеге түгәрәккә бик теләп 10 булачак укучы йөри икән.

Бу көннәрдә Иске Иглайда яшәүче Алексеевларда каз өмәләре гөрли. Алар быел 450 баш баш каз үстергәннәр.
- Ял көннәрендә 40 баш каз суеп эшкәрттек, - ди хуҗабикә Альбина Алексеева. – Якын араларда күпләп Мәскәүгә алып китәчәкләр.

Җирле талантыбыз–Югары Нурлат микрорайоны егете Рамил Хаҗиморатовның “Дусларым-туганнарым” дигән дискы дөнья күрде. Анда кергән 7 җыр җирле шагыйрәбез Фәүзия Мөхәммәтова сүзләренә язылган. Хәзер Рамил Якты Күл авылында һәм Югары Нурлат микрорайонында беренче дискын тәкъдир итү нияте белән яши икән.

Югары Нурлат микрорайонында Өлкәннәр көне уңаеннан бәйрәм чарасын оештыруның төп мәшәкатьләрен территориаль иҗтимагый совет җитәкчесе Ильяс Төхфәтуллин үз өстенә алган. Әлбәттә, микрорайонның мәдәният һәм мәгариф учреҗдениеләре хезмәткәрләре дә бәйрәмне оештыруда читтә калмаганнар:  мул табын да, күңелле концерт та өлкәннәр күңеленә хуш килерлек булган, сабыйлар чыгышы аеруча күңелләрне нечкәртерлек яңгыраган.

Карл Маркс урамындагы 2нче йортның беренче подъездында  яшәүчеләр капиталь ремонттан соң яңарып, матураеп киткән подъездларын үрнәк төстә сакларга килешкәннәр. Һәм шуңа ирешкәннәр дә: ремонттан соң ике ел үтсә дә, ачык төскә буялган стеналарына, аксыл плитә җәелгән идәннәренә бер генә дә зыян салдырмыйлар.