ЯҢАЛЫКЛАР

30 августта Нурлатта “Яшел Россия-Бөтенроссия экологик шимбә өмәсе” акциясе узачак.  Әлеге акция кысаларында “Төзекләндерү биш” җәмгыяте чүп-чар өчен өстәмә контейнерлар куячак һәм каты – көнкүреш калдыклары полигонына бушлай илтү оештырылачак. 

Бүген Казанда уза торган ТР Президенты һәм аның тормыш иптәше Рөстәм һәм Гөлсинә Миннехановлар исеменнән оештырылган республиканың иң яхшы гаиләләрен тантаналы Кабул итүгә Андреевка авылыннан 40 ел бергә гомер иткән Валентина һәм Владимир Тарасовлар гаиләсе чакырулы.

Дүшәмбе көнне районның “Сөләйманов Ә И “, “Южная” ,”ИРС”, “Колос” һәм “Космос” хуҗалыклары районда беренчеләрдән булып урып-җыю эшләрен тәмамладылар.  Башка хуҗалыкларда да урак азагына якынлашып килә. 

Кичә, 25 августта, район үзешчәннәреннән  торган агитбригада “Агро-Развитие” хуҗалыгының Салдакай янындагы басуына барып, игенчеләргә иҗади күчтәнәч ясады. Район башкарма комитетының мәдәният бүлеге җитәкчесе Әлфия Галәветдинова кыр хезмәтчәннәренә  район җитәкчелегенең теләкләрен җиткерде, алга таба да хезмәтләрендә уңышлар һәм иминлек теләде. Валентина Голубева, Радик Яруллин, Илшат Гайсин, Олеся Тахтаманова, Наилә  Җиһаншина һәм башка мәдәният хезмәткәрләреннән торган иҗади коллектив кырда эшләүчеләргә иң матур җырлар һәм шигырьләрен бүләк итте.