Ветеринарлар көзге чорда йорт кошларын ябып асрарга киңәш итә
– Россиядә кош гриппы буенча катлаулы хәл килеп туды. Сәнәгый кошлар әле азмы-күпме сакланган, ә менә районның шәхси ярдәмче хуҗалыкларында ачык шартларда асрала торган кошкортка куркыныч яный, – ди ТР Министрлар Кабинеты Баш ветеринария идарәсенең ветеринария куркынычсызлыгы һәм дәүләт күзәтчелеге территориаль бүлеге консультанты Ольга Алексеева.
– Кыргый кошлар вирусны таратучылар булып санала, көзен җылы якларга очып киткәндә алар кырларда, сулыкларда һәм торак пунктларда тукталып, йорт кошларына авыру йоктыра. Шуңа да йорттагы кош-кортны ябып асрарга кирәк. Якын араларда аларны суя башласагыз да яхшы булыр. Чөнки вирус һава-тамчы юлы белән күчә һәм хуҗалыкка эләкте икән, зур чыгымнар китереп чыгарырга мөмкин. Билгеле булганча, кош гриппы бер генә кошка йокса да, хуҗалыктагы бөтен кош-корт юкка чыгарыла. Кошларның массакүләм авыру яки үлү очраклары булса, бу хакта кичекмәстән ветеринария табибларына яки район ветеринария берләшмәсенә хәбәр итәргә кирәк.