«Ак калфак» конкурсында уңыш: Нурлат районыннан Айгөл Әхмәтҗанова - иң яхшы укучылар арасында
Ул Бөтенроссиякүләм конкурста призер булды.
Нурлат районы Колбай-Мараса мәктәбенең 11 сыйныф укучысы Айгөл Әхмәтҗанова «Ак калфак» IX Бөтенроссиякүләм кызлар һәм яшүсмерләр конкурсының финалында чыгыш ясады. Яшь конкурсант, үзенең белем һәм иҗади сәләтләренең югары дәрәҗәсен раслап, дәрәҗәле ярышның дипломанты булды.
Быел масштаблы конкурска 162дән артык кеше җыелган иде. Сынау нәтиҗәләре буенча финалга 14 катнашучы чыкты: иң яхшылар арасына 7 кыз һәм 7 егет керде.
Айгөлнең уңышы - зур һәм артында тырыш хезмәт торган лаеклы җиңү. Укытучысы Галиуллина Рәмзия Гасыйм кызының хезмәте аеруча зур хөрмәткә лаек. Чын профессионал һәм үз эшенең остасы, педагог үз укучыларын илһамландыра, аларны төрле ярышларда көчләрен сынап карарга һәм амбициоз максатлар куярга курыкмаска этәрә.
Конкурс йомгаклары буенча Айгөлгә диплом, уникаль көмеш алкалар һәм традицион мәдәни мирас һәм хатын-кыз матурлыгы символы булган чигелгән калфак тапшырылды.
Талантлы мәктәп укучысы ирешелгән уңышларда тукталырга җыенмый. Озакламый Айгөл татар теленнән халыкара олимпиадада район данын яклаячак. Аңа үз көченә ышаныч һәм яңа җиңүләр телик!