Нурлатта чувашча этно-туй узды
Михаил һәм Кристина Гавриловлар бүген законлы никахларын теркәделәр. Тантаналы чара Халыклар дуслыгы йортында узды.
Бу урын очраклы гына сайланмаган. Бу чын-чуашча этно-туй иде. Кияү белән кәләш, ата-аналар һәм хәтта кунаклар да милли костюмнар киеп тантанага килделәр. Регистратор сүзе, яшь парларга тугрылык анты, якыннары һәм мактаулы кунакларныж котлау сүзләре – барысы да чуаш телендә яңгырады.
– Чын күңелдән сезгә кояш кебек бер – берегезне җылытып, мәхәббәт һәм татулыкта яшәвегезне телибез, - диде район башлыгы Алмаз Әхмәтшин исеменнән һәм шәхсән үз исеменнән Нурлат шәһәре Советы Рәисе урынбасары Владимир Кашкаров. Халык зирәклегенә таянып, ул яшьләргә кунаклар белән ачык йөзле булырга, ызгыш-талашка юл куймаска, өлкәннәргә ихтирам һәм хөрмәт белән карарга үгет-нәсихәтләрен бирде.
-Балалары күп булган гаилә - ныклы һәм бәхетле гаилә. Сезнең җиде булмаса да, биш балагыз булсын, - дип теләде ул Михаил һәм Кристинага.
Символик бүләкләрне Халыклар дуслыгы йорты директоры Галина Терентьева да бүләк итте. Бу фотоальбомнар.
- Берсе - Туй фотолары өчен, ә икенчесе-кыз һәм улыгыз өчен булыр, - дип изге теләкләр белән бүләкләр тапшырды.
Тантанада чуваш халкының башка туй йолалары да үтәлде. Егоркинодан килгән «Шулкеме» халык ансамбле кәләшне киендерү йоласын күрсәтте, ә «Родник» халык ансамбле күңелле милли көйләр астында биеп, кәләш һәм кияү гаиләләрен таныштырды. Тантана күңелле һәм матур узды. Ул яңа өйләнешкән парлар һәм аларның кунаклары өчен дә онытылмаслык булды.