ЯҢАЛЫКЛАР

Бүген, 28 февральдә район советы бинасында Нурлат муниципаль районы башлыгы каршындагы дини һәм иҗтимагый оешмаларның үзара элемтәсе советының түгәрәк өстәл артында сөйләшүе булды. Район башлыгы Равил Кузюров рәислегендә үткән сөйләшүдә Татарстан Республикасы Президентының эшләр идарәсе гомуми бүлек мөдире Руслан Мәрданшин да катнашты.

“Нурлат җиренең күренекле кешеләре” белешмәлек-китабына Нурлат җирендә туып-үскән, яисә биредә гомер кичереп районның гына түгел, Татарстан, Россиянең үсешенә сизелерлек шәхси өлеш керткән 600гә якын кешенең исем-фамилиясе кергән.

Районның 600 IX сыйныф укучысы татар теле буенча тестлаштыру узачак. Моннан тыш, математика һәм рус теленнән ГИА тапшырачаклар. Татар теленнән тестлаштыру контроль-бәяләү материалы формасында булачак. Татар телле мәктәп укучылары өчен вакыт 3 сәгать 55 минут бирелсә, рус телле яшьтәшләре өчен ул 2 сәгать 30 минут булачак. Татар теленнән тестлаштыру 29 апрельгә билгеләнгән.

Районара сукырлар җәмгыяте әгъзалары хәзер җәмгыятькә килеп Интернет челтәреннән файдалана алалар. Җәмгыятькә ел буена  Интернет челтәреннән файдалануга “Макойл” җәмгыяте финанс ярдәме күрсәткән. Хәзер аларның моңа кадәр социаль проектлар конкурсында җиңеп откан Грант акчаларына алынган өч компьютерларын да Интернет челтәренә тоташтыру мөмкинлеге бар.

Баян, гармун һәм кыллы музыка коралында уйнарга өйрәнергә телисезме? Алай булганда, район мәдәният йортына рәхим итегез. ТРның атказанган мәдәният хезмәткәре Сәмигулла Рәхмәтуллин алда телгә алынган уен коралларында шөгыльләнергә теләге булган шәкертләрдән төркем туплый. Уку-өйрәнүләр атнасына ике тапкыр оештырылачак.

Бүген, 27 февраль көнне Киекле  һәм шәһәрнең 9нчы урта мәктәпләренең 9-11 сыйныф егетләре командалары  хоккей буенча дусларча очрашу уены үткәрделәр. “Ледок” боз сараенда узган ярышларда 5:0 исәбе белән Киекле урта мәктәбенең егетләр командасы җиңде.

Бүген һәм иртәгә Мәскәүдә уза торган КиЭкспо күргәзмәсе кысаларында перманент макияжы буенча Россиянең ачык чемпионатында Studio Effect салонының  перманент макияжы остасы Татьяна Стручкова катнаша.

Гыйнвардан 25 февральгә кадәр Нурлат районында ОРВИның 180 очрагы теркәлгән. 2013нче елның шул чорында 505 булган.

Бүген, 26 февральдә,  “Южная”  агрофирмасы” ОООсы базасында үткән район авыл хуҗалыгы семинары бер вакытта ике – язгы чәчүгә әзерлек һәм терлекчелектә көтүне яңарту темаларына багышланды. Район башлыгы Равил Кузюров, районның  авыл хуҗалыгы һәм азык-төлек идарәсе начальнигы Ислам Сафиуллин, барлык хуҗалык җитәкчеләре һәм белгечләре  катнашында үткән семинарның беренче өлеше агрофирманың машина-трактор паркында үтте.

Бүген, 26 февральдә Нурлатның үзешчән артистлары “Татарстан – Яңа гасыр” телеканалының “Җырлыйк әле”  программасына язылуга сайлап алу турын уздылар. Сайлап алу турында “Җырлыйк әле”  проектының җитәкчесе Нәҗип Бәдретдинов та катнашты.