Нурлат балалар китапханәсендә иң калын формуляр булган укучының исеме билгеле булды
Җәй көне мәктәп укучыларыннан иң күп китапны кем укыды икән? Әлеге сорауга җавапны шәһәр балалар китапханәсендә бирделәр. Җәйге каникуллар нәтиҗәләре буенча, кызлар арасында иң калын формуляр Амелия Бакированыкы, малайлар арасында – Самат Минһаҗевныкы. Амелия 9нчы мәктәпнең 4б сыйныфында укый. Июнь аеннан сентябрь башына кадәр ул 40тан артыграк китап укып чыккан.
– Бу – җәйгә бирелгән һәм үз эченә 30 әсәрне алган әдәбият исемлеге, моннан тыш, Амелия өстәмә рәвештә ирекле уку өчен тагын 10нан артыграк китап сайлады, – дип билгеләп үтте Нурлат балалар китапханәсе мөдире Галина Ерышова. Самат – шәһәр гимназиясенең 6В сыйныфы укучысы.
– Ул фантастика һәм юмористик хикәяләр укырга бик ярата. Укыганнары турында һәрвакыт китапханәчеләр белән уртаклаша, – дип аны барлык яшь китап укучыларга үрнәк итеп китерә Галина Михайловна.