Туган тел үсеше: Марат Әхмәтов тарафыннан Нурлат районы тәҗрибәсе югары бәяләнде
Нурлат муниципаль районына эш визиты белән Татарстан Республикасы Дәүләт Советы Рәисе вазыйфаларын башкаручы, татар телен һәм башка туган телләрне саклау һәм үстерү мәсьәләләре буенча Татарстан Республикасы Рәисе каршындагы Комиссия җитәкчесе Марат Әхмәтов килде.
Район Башлыгы Дамир Ишкинеев озатуында ул милли мәгариф һәм тәрбия системасын җентекләп өйрәнде, төбәкнең мәдәни күптөрлелегенә ярдәм итүгә юнәлдерелгән дәүләт программаларын гамәлгә ашыруның нәтиҗәлелеген бәяләде.
Сәфәр барышында мәгариф учреждениеләренә аерым игътибар бирелде. Маршрутның беренче пункты Егоркино урта мәктәбе булды – чуваш мәдәниятенең чын терәге, анда 53 бала укый. Биредә милли компонент мәктәп тормышының барлык өлкәләренә дә интеграцияләнгән: туган тел һәм әдәбият дәресләреннән алып укучыларның «Аталан» форумы, «Уяв» бәйрәме, «Чуваш гүзәле» конкурсы кебек масштаблы чараларда актив катнашуына кадәр. Балалар теорияне өйрәнеп кенә калмыйлар, традицияләрне җыр һәм бию ансамбльләре составында да саклый. Мәктәп китапханәсе һәм уникаль музей эше белән сокланган Марат Әхмәтов инициатива белән чыкты: Егоркино мәктәбе базасында инновацион-методик үзәк булдыруны планлаштырырга. Бу чуаш телендә тәрбияләүнең уңышлы тәҗрибәсен республиканың Кама аръягы зонасына киңәйтергә мөмкинлек бирәчәк.
Визит 891 укучының яртысыннан артыгы татар телен туган теле итеп сайлаган Советлар Союзы Герое Михаил Сергеев исемендәге гимназиядә дәвам итте. Гимназия укытуга алдынгы караш күрсәтә: башлангыч сыйныфларда аерым фәннәрне татар телендә эксперименталь укыту уңышлы гамәлгә кертелә, ә ел саен ачыла торган милли тәрбияле сыйныфларга ихтыяҗ зур. Тел мохитенә чумуның иҗади методы биредә театр студиясе аша тормышка ашырыла, аның туган телендә куелган спектакльләре кунаклар тарафыннан югары бәяләнде. Түгәрәк өстәл артында педагоглар белән турыдан-туры диалог лингвистик белем бирүнең хәзерге шартларда актуаль мәсьәләләре һәм үсеш перспективалары турында фикер алышырга мөмкинлек бирде.
Күптән түгел «Татарстанның иң яхшы билингваль балалар бакчасы» республика грантлар конкурсының триумфаторы булган «Алсу» балалар бакчасы мәктәпкәчә яшьтәге балалар белән эшләүнең ачык мисалы булды. Учреждение педагоглары кунакларга Идел буе халыкларының көнкүрешен өйрәнү буенча комплекслы проектны һәм эшнең инновацион формаларын: үз мультстудиясен һәм Габдулла Тукай әкиятләре мотивлары буенча театральләштерелгән куелышны күрсәтте.
Марат Әхмәтов балаларның туган телдә иркен сөйләшүләрен күреп чын күңелдән гаҗәпләнүен белдереп, визитка йомгак ясады. Аның сүзләренә караганда, Нурлат педагогларының методик эшләнмәләре һәм аларның авторлык инновацияләре үрнәк тәҗрибә булып тора, аны милли байлыкны саклауның эталон моделе буларак республиканың күрше районнарына һәм шәһәрләренә күрсәтергә кирәк.