Нурлатта укытучыларны һөнәри бәйрәмнәре белән котладылар
Традиция буенча район педагогларын хөрмәтләүче тантаналы чараны Нурлат муниципаль районы Башлыгы Дамир Ишкинеев сәламләү сүзе белән ачып җибәрде.
"Укытучы һөнәре һәр чорда мөһим һәм хөрмәтле санала. Сез, педагоглар, балаларны Белем белән тәэмин итеп кенә калмыйсыз, ә үз укучыларыгызның да, тулаем дәүләтнең дә киләчәгенә нигез саласыз. Сезгә сәламәтлек, озын гомер, уңышлар һәм гаилә иминлеге телим», – диде ул.
Аның катнашында бүләкләү тантанасы да булды. Ул алдынгы педагогларга тармак бүләкләре, Рәхмәт хатлары, Мактау грамоталары һ.б. тапшырды. Сәхнәгә беренчеләрдән булып гимназиянең физика укытучысы Лариса Мазилкина күтәрелде. Күренекле казанышлары һәм күпьеллык намуслы хезмәте өчен Дамир Азат улы аңа «Татарстан Республикасы Мәгариф һәм фән өлкәсе отличнигы» билгесен тапшырды.
"Минем хезмәтемнең шулай югары бәяләнүенә бик шатмын. Бу бүләк һәм үзенә күрә минем 30 елдан артык педагогик эшчәнлегемә йомгак ясау һәм, әлбәттә инде, алга таба барырга, үсеп килүче буынны тәрбияләү өчен эшләргә этәргеч", - дип билгеләп үтте Лариса Петровна. Аның укучылары күп тапкырлар «Олимпка юл» республика олимпиадасында, башка күпсанлы конкурсларда, фәнни-гамәли конференцияләрдә җиңүчеләр һәм призерлар булдылар.
Ветеран укытучылар-нурлатлыларның күп буыннарын үстерүгә һәм тәрбияләүгә бәяләп бетергесез өлеш керткән кешеләр. Алар инде күптән дәресләргә ашыкмасалар да, күңелләре һәм йөрәкләре белән элеккечә укучылары һәм тәрбияләнүчеләре өчен кайгырталар. Укытучылар көненә багышланган бәйрәм концертында да алар укучыларның һәм хезмәттәшләренең иң изге теләкләренә һәм ихлас рәхмәт сүзләренә лаек булдылар.
Әлфия Әхмәтсәгыйрова 50 ел гомерен мәгариф өлкәсенә багышлаган. Бүген, лаеклы ялда булганда, соңгы елларда математика укыткан шәһәр гимназиясе коллективы һәм укучылары белән элемтәсен югалтмый. Контрактчы улын СВОга озаткан ананың йөрәге барлык сугышчылар өчен борчылулар белән тулы, алар арасында үз укучылары да аз түгел. Нәкъ менә шул көнне ул 2 атна элемтәгә чыкмаган улыннан күптән көтелгән хәбәр алуы да аңа аеруча кәеф өстәде.
"Безгә күрсәткән игътибар бик күңелле. Мөгаен, ике датаның – өлкән кешеләр көне һәм укытучылар көненең бер-бер артлы баруы очраклы түгелдер. Һәм бүген котлаулар кабул итү – безнең өчен икеләтә бәйрәм», - дип уртаклашты Әлфия Галиевна.
Ә педагогик хезмәт ветераннары Лидия Арбузова һәм Асия Гатина бу көнне дә юбилей датасы уңаеннан шәхси календарьда да котлаулар кабул итте-шушы көннәрдә икесе дә 70 яшьлеген билгеләп үттеләр. Лидия Ивановнаның стажы якынча 40 ел тәшкил итә, шушы еллар дәвамында Каравыл-Тавы мәктәбендә рус теле һәм әдәбияты укытучысы булып эшли, ә Асия Гәрәй кызы «Камыр Батыр» балалар бакчасының татар теле укытучысы булып эшләп бөтен гомерен балаларга багышлаган.
Районның баш педагогы Алсу Рәхмәтуллина да коллегаларын котлады. Кыскасы, бу көн күңелле сюрпризларга һәм котлауларга бай булды, яшь нурлатлылар һәм җирле сәхнә осталары чыгышлары бәйрәмгә аерым бер мохит өстәде.