Иң кадерле бүләк

Ватан сакчылары көне алдыннан Казан Кремлендә Татарстан Президенты Рөстәм Миннеханов кулыннан Җиңүнең 70 еллыгына юбилей медальләрен алучы 50дән артыграк сугыш һәм тыл ветераны арасында Биккол авылыннан Һади Фәхретдинов та бар иде.

Һади Фәхретдин улының республика җитәкчелегеннән беренче генә бүләк алуы түгел инде бу. 1976нчы елда Хезмәт Кызыл Байрагы орденын да шулай Казанга барып, ул чактагы өлкә комитетының беренче секретаре Фикрәт Табеев кулыннан алырга насыйп булган аңа. 40 елга якын вакыт узса да, әлеге вакыйганы яхшы хәтерли әле тыл хезмәтчәне. Чираттагы сәфәреннән дә бик канәгать калган. “Бик хөрмәтләделәр, бик зурладылар. Бик дулкынландым. Президент үзе кулны кысып медаль тапшыргач, исәнсау эшләгез дип, рәхмәт әйтер-

гә ашыктым”, - дип тәэсирләрен уртаклаша. Әлеге чара исә Фәхретдиновларның зур гаиләсе өчен истәлекле һәм сөенечле вакыйга булган. Һади ага да бу арада зур дулкынлану белән истәлекләргә ешрак бирелә. Гаиләдә 10нчы бала булып дөньяга килә, 3 яшендә әтисез кала, сугыш башланганда исә аңа нибары 11 яшь кенә була. Ике абыйсы сугышка алына, гаиләдәге төпчек малайга апалары һәм яшьтәшләре белән бергә хезмәт итәргә туры килә. Башка бик күпләр сыман ук колхоз сыерларын җигеп көлтә дә, урман да ташыйлар, чәчү чәчкәндә, урак урганда да эш арбасын җигелеп тарталар. Суыгын, ачлыгын да күрергә туры килә. 1945нче елда исә әниләре дә

вафат була. Һадига 15 яшеннән комбайнчы ярдәмчесе булып басуга чыгарга туры килә. Балачактан хезмәттә булып, тырышлык, төгәллеккә күнеккән егет 1952–55 елларда армия хезмәтен узганда да үзен бары тик яхшы яктан гына күрсәтә, аннан бер кочак мактау кәгазе, үзе турында язылган газета кисемтәләре төяп кайта. Авылда таныклык алып комбайн руле артына утыра һәм 22 ел буена колхозда иң алдынгы

комбайнчыларның берсе була. Ул чагында авылда нибары 4 комбайнчы санала, көнне төнгә ялгап эшләргә туры килә. Әмма сынатмыйлар.

- Әти уракта вакытта кырга төшке аш илтергә барабыз. Әтинең комбайнын исә йолдызларыннан ерактан ук аера идек, - дип исенә төшерә кызы Фәнүзә. – Ул чагында суктырылган һәр 1000 центнер өчен комбайнга бер йолдыз өсти баралар иде бит. Тырыш хезмәте дәүләт тарафыннан югары бәясен дә ала, ел саен хөрмәтлиләр үзен. Комбайннан китүенә исә басуда килеп чыккан бәхетсезлек очрагы сәбәпче була. Әмма хезмәттән аерылмый, озак еллар буена ферма мөдире булып эшләп, шуннан лаеклы ялга китә. Ә авылда Һади Фәхретдиновны

иң тырыш, иң уңган гаилә башлыгы итеп тә беләләр әле. Авылда беренче телевизор, беренче стационар телефон, беренче мотоцикл да Фәхретдиновларда барлыкка килә, иң зур, иң төзек йорт, иң нык хуҗалык та Һади аганыкы була. Тормыш иптәше Нәфисә апа белән игелекле һәм тырыш 6 бала тәрбияләп үстерәләр. Кызганычка каршы, Нәфисә апа гына яшьли үлеп китә. Әмма Һади Фәхретдинович

ялгыз түгел, бүгенге көндә улы Рәис һәм килене Равидә гаиләсе белән яши. Уллары, кызлары һәм оныклары да әтиләре янына еш кайтып йөриләр, төп йортта тормыш кайнап тора. Тагы бер кызы Фәүзия әйтүенчә, ул аларга әти дә, әни дә була белә. Һади ага үзе дә 85 яшен тутырып килсә дә, тик утыра торганнардан түгел әле. - Нәрсә эшләсәк тә иң беренче әти белән киңәшәбез. Ул үзе дә бөтен йортны контрольдә тота, - ди улы Рәис. 9нчы сыйныфта укучы оныгы Рәмис тә күп эшкә, пөхтәлеккә һәм төгәллеккә бабасыннан өйрәндем, дип саный. Әнә, бабасының шифоньерында киемнәре ничек пөхтә итеп элеп куелган, Мактау грамоталары, медальләре дә иң кадерле урында саклана. Алар янына хәзер тагы бер – Җиңүнең 70 еллыгы медале дә өстәлде. Авыр балачак, озак еллар дәвамындагы фидакарь хезмәт бәрабәренә яулап алынганга, ветеран өчен аеруча кадерле бүләк ул.