Колбай Мораса җирлегендә узган елга нәтиҗәләр ясалды, быелга бурычлар билгеләнде

Колбай Мораса авыл җирлегендә халык җыены  авыл халкының актив катнашында узды. Музей хезмәткәрләре көче белән биредә күргәзмә оештырылган, җирле үзешчәннәр концерт әзерләгән иде.

2014 елгы эшләргә хисап белән авыл җирлеге башлыгы Идрис Хөснетдинов чыгыш ясады. Авылда урта мәктәп, мәдәният йорты, мәчет, медпункт, Кариев исемендәге музей, балалар бакчасы, китапханә, шәхси кибетләр бар. Узган елда җирлек башлыгына гражданнардан 57 мөрәҗәгать кергән, алар буенча тиешле карарлар чыгарылган. 10 км электр линиясе сузылган, авыл урамнарында 70 яктылык диодлы лампалар куелган. Бүгенге көндә иң актуаль проблемаларның берсе булып авыл эчендәге юллар тора, җәен су җитми, тагы бер су башнясы кирәк, бәйдә тормаучы этләр күп.

Авыл җирлеге башлыгының докладын урта мәктәп директоры Мансур Вәлиевның чыгышы тулыландырды. Мәктәпкә агымдагы ремонт ясалган, ул Интернет челтәренә тоташтырылган, матди-техник базасы да әйбәт. РФ МВДсының Нурлат районы бүлеге вәкиленең чыгышыннан күренгәнчә, җирлектә 155 кеше административ җаваплылыкка тартылган. “Кызыл Шәрыкъ” вәкиленә хезмәт хаклары түләү буенча сорау яңгырады. 

Җыенда район башлыгы Равил Кузюров та катнашты һәм чыгыш ясады. Ул агымдагы елда торган эшләр турында кыскача гына сөйләп үтте. Авыл эчендә юл төзеләчәге, мәктәпнең капиталь ремонтланачагы турында хәбәр сөенеп кабул ителде. Район башлыгы бу кустта агрофирма оештыру планы турында да әйтте. Шәхси ярдәмче хуҗалыкларын үстерүчеләргә ярдәм вәгъдә итте. Шулай ук Сельцо Морасага юл буенча да сорау булды, бу авылга күрсәткеч тә юк икән.

Район башлыгына узган ел саву аппаратлары тапшырганы өчен рәхмәт җиткерделәр. Шул ук вакытта авылга автобус маршрутына кагылган проблема да бар әле. Мәдәният йортының музыкаль аппаратурасы, тренажерлары юк. Авыл халкын су җитмәү мәсьәләсе дә борчый, район башлыгы күтәрелгән барлык проблемаларны да анализларга кушты һәм аларны хәл итүне шәхси контроленә алды.