Мөрәҗәгатьләр кабул ителә

Татарстанның “Халык контроле” дәүләт мәгълүмати системасына эшли башлаганнан бирле нурлатлылардан 401 заявка кергән.

Аларның яртысыннан артыграгы – 223е узган ел булган. 22 категория заявка арасында нурлатлылар икесеннән активрак файдалана.

Аларның берсе территорияләрне төзекләндерүгә кагылышлы – узган ел бу уңайдан нурлатлылар мәгълүмат системасына 84 тапкыр мөрәҗәгать иткән. Тагы бер популяр төр – юл хәрәкәтен оештыру – анда 71 хәбәр бирелгән. Хәер, бу ике категория тулаем республика буенча да популяр икән. Аның беренчесенә татарстанлылар 9201, икенчесенә 6437 тапкыр мөрәҗәгать иткәннәр. Сишәмбе көнне Министрлар Кабинетында узган видеобрифингта шундый саннар китерелде. Әлеге һәм башка хәбәрләр арасында “Кире кагылды” статусы бирелгәннәре дә бар. Район башкарма комитетының эшләр идарәчесе Ралия Ханиева әйтүенчә, бу асылда кешеләрнең үз  хәбәрләрендә сүгенү, тупас сүзләр файдалануы белән бәйле икән. Ялган мәгълүматлар да булгалый. Республика модераторлары һәр мөрәҗәгатьне эшкәртәләр, һәр факт тикшерелә һәм мәгълүмати системага хәл ителергә тиешле хәбәрләр генә кертелә. Ә хәбәрләрнең ничек контрольдә тотылуын нурлатлылар үзләре дә сыный алды. Мисал өчен, җәен Нурлатта “Халык контроле” системасының баш модераторы Татарстанда кеше хокуклары буенча уполномоченный Сәрия Сабурская булып киткән иде. Ул нурлатлыларның зарларында күрсәтелгән адреслар буенча йөреп чыкты. Ә видеобрифингта ул бары тик бер генә хәбәр, анысы да нигезле рәвештә баш тартылган ике район арасында Нурлатны да уңай яктан билгеләп үтте. Монда “Халык контроле”нә мөрәҗәгать итәргә теләге булган һәркемнең дә заявкадан тыш, информсистеманы үстерү буенча үз тәкъдимнәрен калдыру мөмкинлеге бары да әйтелде. Ә быелдан “Халык контроле” системасына яңа – экстермизм, дини һәм милли нигездәге низаглар, коррупция фактлары, производстводагы җәрәхәтләр буенча категорияләр дә кертеләчәк. Моннан тыш, “Халык контроле”ның технологик платформасын гражданнар һәм дәүләт арасындагы хезмәттәшлекнең яңа механизмнарын эшләүдә файдалану ниятләнә.