Район башлыгы юлларны, төзелеш объектларын карап чыкты

Бүген, 3 гыйнварда район башлыгы Равил Кузюров иртәнге якта шәһәр эчендәге юлларның һәм ишегаллары территорияльренең торышын карап чыкты, аннан райондагы төзелеш объектларында булды.

Иң элек Равил Кузюров шәһәрнең барлык микрорайонннарында да булып, андагы юлларның торышы белән кызыксынды. Бүгенге көндә Нурлат эчендәге юлларның чисталыгы өчен “Торак-коммуналь хуҗалыгы” ИК МУПы, ә райондагы төбәк юллары өчен “Татнефтедор”ның НУАД җәмгыяте җавап бирә. Берочтан район башлыгы Нурлат автоюллар идарәсендә булып, НУАДтагы юл чистарту техникасының ни хәлдә икәнлеген дә карап чыкты.

Төзелеш объектларыннан исә иң элек ремонтланучы йортларга тукталдылар. Алар арасында Мәктәп ур., 29дагы тулай торак, шикәрчеләр микрорайонындагы ике йорт та бар иде. Мисал өчен, подрядчылар “Новый дом”  ОООсы бүгенге көнде Завод ур., 9дагы йортның түбә эшләрен төгәлләп килә, шул көннәрдә икенче объектка күчәргә ниятли. Район башлыгы иң элек игътибарны эшнең сыйфатына юнәлтергә кушты, шулай ук эшләрне озакка сузмаска кирәклеген дә кат-кат искәртте. “Бюджет елы озын түгел, шуңа да һәр эшне срогында башкару зарур”, – диде.

Аннан Равил Кузюров район башкарма комитеты җитәкчесенең инфраструктур үсеш буенча урынбасары Рөстәм Карама һәм төзелеш бүлеге начальнигы Илнур Бәхтияров озатыуында Каравыл Тавында төзелеп килүче күпфункцияле үзәктә, район үзәк хастаханәсе поликлиникасында, Төньяк-көнчыгыш микрорайондагы балалар бакчасы төзелешендә дә булды. Маршрутның соңгы ноктасы шәһәрнең 2нче мәктәбе иде. Биредә тиздән капиталь ремонт эшләре башланачак. Подрядчы оешма – “Премьер-сити” компаниясе җитәкчесе Вячеслав Панков капиталь ремонт программасы кысаларында башкарылачак өстенлекле юнәлешләрне ассызыклап үтте. “Иң элек, түбәне, тәрәзәләрне һәм җылылык системасын алыштырачакбыз”, – диде ул. Гомумән, мәктәптәге ремонт эшләренә 20 миллион сумга якын акча бүлеп бирелә, бүгенге көндә биредә конкрет эшләр планын, сметаны билгеләү белән мәшгульләр. Равил Әфраимович бу эшләрне 15 гыйнварга төгәлләргә кушты, бу вакытка без башкарылачак эшләрнең тулаем картинасын күзалларга тиеш инде, диде ул.