Бер гасыр бер көн кебек

Бәйрәм тантанасында участок хастаханәсе хезмәткәрләрен район башлыгы Равил Кузюров исеменнән район башкарма комитеты җитәкчесенең социаль-мәдәни мәсьәләләр буенча урынбасары Рәмзия Сингатуллина котлады.
– Бүген без билгеләп үтүче дата Чулпан участок хастаханәсе, районның сәламәтлек тармагы гына түгел, ә тулаем республика өчен дә истәлекле вакыйга, – диде ул бәйрәмгә җыелучыларны котлап. Рәмзия Зәкиевна пациентларга кайгыртучан мөнәсәбәтләре өчен һәммәсенә дә район башлыгы исеменнән теләкләр җиткерде. – Бу системада олы йөрәкле кешеләр генә хезмәт итә.
Нурлат район хастаханәсе баш табибы Марат Йосыпов та шуны ассызыклады.
Ул үз чыгышында Чулпан участок хастаханәсенең фото һәм видеоматериаллар белән ныгытылган бай тарихлы сәламәтлек саклау учреждениеләренең берсе булуын әйтте.
- 100 ел безгә үз тормышын ышандырган пациентларның кайгыртып үткәргән вакыт ул, - диде. Ул оптимальләштерү мәсьәләләренә дә тукталды. Әмма баш табиб сүзләре оптимистларча иде: - Авыл җирендә кыскартуларны булдырмас, хастаханәнең ябылуына юл куймас өчен без барысын да эшләячәкбез.
Ә Чулпан хастаханәсе – оптимальләштерүне кичергән һәм үз статусын саклап кала алган учреждениеләрнең берсе.
– Участок хастаханәсендә тәүлек әйләнәсе эшләүче 20 һәм көндезге 10 койкалы стационар, сменага 100 кешене кабул итә алучы поликлиника бар, – диде Чулпан участок хастаханәсе баш табибы Дилбәр Шәяхмәтова үз чыгышында.
Авыл хастаханәсенең куәте исә аз түгел. Бирегә 22 авыл халкы мөрәҗәгать итә, хезмәт күрсәтү радиусы 30 километр. Бүген биредә ике гомумпрактика табибы, педиатр, стоматолог, стационар терапевты, 15 шәфкать туташы эшли. Үзләренең “ашыгыч ярдәм” машинасы да бар. Гомумән, участок хастаханәсе, бернигә дә карамастан, халыкка сыйфатлы медицина ярдәме күрсәтеп тора. Поликлиникада стоматолог, гомумпрактика табибы, педиатр, теш технигы кабинетлары бар, урында ук ЭКГ, УЗИ ясатырга да була, клиник лаборатория, физиотерапия кабинетлары һәм башкалар эшләп тора. Дилбәр Фәритовна әйтүенчә, поликлиникада  үзәк даруханә филиалы да бар икән, ә дарулар белән тәэмин итү район хастаханәсе даруханәсе аша башкарыла. Әмма шулай да аларның көндәлек хезмәтенә иң мөһим бәяне пациентлар куя, әлбәттә. Участок хастаханәсенең медицина хезмәткәрләре бу уңайдан бик бәхетлеләр – рәхмәт сүзләрен еш ишетәбез, диләр.
...Әнә, табын артында берничә буын медицина хезмәткәрләре урын алган. Алар әле берничә дистә еллар элек Чирмешәннән су ташуларын да, пациентларның өстәлләрендә ит-сөт булсын өчен, сыер-сарыклар асралуын да яхшы хәтерлиләр. Бүген исә участок хастаханәсе заманча җиһазланган, газ белән җылытыла, су, канализациясе бар, хастаханәгә килү дә проблема тудырмый – асфальт юл түшәлгән. Әлләни зур темплар белән үк булмаса да, авыл хастаханәсе барыбер алга атлый. Һәм, ветераннар һәм бүгенге медицина хезмәткәрләре әйтүенчә, беренче 100 ел бер көн кебек кенә үтеп киткән икән.