Район мәктәпләрендә кышкы каникуллар 29 декабрьдә башланачак

Район мәктәпләрендә кышкы каникуллар 29 декабрьдә башланачак. Ә 22 декабрьдән районның барлык мәгариф һәм мәктәпкәчә белем бирү учреждениеләрендә чыршы бәйрәмнәре уза башлады. Каникуллар 11 гыйнварда тәмамланачак, дип хәбәр итәләр район мәгариф идарәсендә.
– Кышкы каникуллар республиканың барлык белем бирү учреждениеләрендә бер чорда уза, - ди мәгариф бүлеге җитәкчесенең тәрбия эшләре буенча урынбасары Эльмира Шагаева. – Монда ата-аналарның үтенечләре дә, 2014-2015 уку елының бердәм планы да искә алынды.
Каникуллар алдыннан районда “Кышкы каникуллар” профилактик чарасы да старт алды. Районның һәр мәгариф учреждениесендә балалар һәм әти-әниләр өчен юл иминлеге, янгын куркынычсызлыгы һәм терроризм темаларына әңгәмәләр, инструктажлар үткәрелә. Моннан тыш, сөйләшүләр вакытында балаларның төнге 10нан соң урамда йөрмәүләренә кагылышлы 71нче Закон турында да искәртелә.
– Каникулларга һәр белем бирү учреждениесенең район мәгариф бүлеге белән килештерелгән үз планы бар, - ди Эльмира Минталиповна.
Шәһәр мәктәпләренең барысында да каникуллар чорында спорт, сәламәт яшәү рәвешенә корылган чаралар оештырылачак. Моннан тыш, 9, 11нче сыйныф укучылары бу чорда чыгарылыш имтиханнарына да әзерләнәчәк. Ә менә 3нче урта мәктәп укучылары кышкы каникулларын экскурсияләргә багышлаячак. Мәктәп укучылары өчен Кама аръягы һәм Нурлат тарихы төбәк музеена, Казан шәһәренә сәяхәтләр оештырылачак. Биредә үк укучылар арасында шәһәр һәм район башлыгы призына волейбол ярышлары көтелә.  Мондый ярышлар Биляр Озеро, Киекле мәктәпләрендә дә узачак. Ә шәһәрнең 4нче урта мәктәбе укучылары  ветераннарга тимурчылык ярдәме оештырырга ниятли.  Шәһәрнең 8нче урта мәктәбе тулысынча имтиханнарга әзерләнергә планлаштыра. Биляр Озеро мәктәбе укучылары Раштуа бәйрәменә дә үз программаларын әзерләгән.  Ә киеклеләр варислар җыенына чакыра. Бу чорда Балалар иҗаты үзәге, спорт заллары, Боз сарае һәм бассейннар да эшләячәк.
Әти-әниләрне дә “озын яллар”  көтә: 1-11 гыйнвар республикада ял көннәре итеп игълан ителде. Димәк, гаилә белән рәхәтләнеп ял итү өчен мөмкинлекләр җитәрлек булачак.