Нурлат егетләре армиягә җибәрелә

Көзге чакырылышта районнан 85 егет армия сафларына озатылачак.

Бүген, 3 октябрьдә, ТР Министрлар Кабинетында Татарстан Республикасы чакырылыш комиссиясенең видеоконференция режимында утырышы үтте. Анда көзге чакырылышның үзенчәлекләре хакында хәбәр ителде, бурычлар билгеләнде.

- Егетләрнең тәүге партиясе ноябрьнең беренче декадасында китәчәк, - ди хәрби комиссариатның хәрби хезмәткә әзерлек һәм чакыру бүлеге начальнигы Илдус Мазияров. – Бар да яхшы булса, 25 декабрьгә кадәр егетләребезне армия сафларына озатып бетерегә тиешбез.  Егетләребезне быел да тантаналы шартларда озатачакбыз. Шуңа да традицион Армиягә китүчеләр көнен 20 октябрьгә планлаштырып торабыз.  Чакырылыш барышында 18-27 яшьлек ир- егетләр алыначак. Араларында 9 кеше югары белемле. Нурлат егетләре коры җир, ракета гаскәрләренә  һәм диңгез флотына юлланачак. 26 егет армия хезмәтенә хәрби-учет белгечлегенә – “С”  категорияле машина йөртүче һөнәренә  ия булып китә. Төп категория – агымдагы елда югары, урта һөнәри уку йортларын тәмамлап диплом алган егетләр чакырылачак.

Республика хәрби комиссары Сергей Погодин билгеләп үткәнчә, агымдагы елның көзге чакырылышында кайбер үзгәрешләр дә бар. Федераль законга кергән үзгәрешләр нигезендә чыгарылышлар бер ел армия яки 2 ел контракт нигезендәге хезмәтне сайлый ала. 27 яшькә кадәр нигезле сәбәпләр аркасында армия хезмәтен (сроклы яки контракт) узмаган затлар  дәүләти һәм муниципаль органнарда эшли алмыйлар.

 Көзге  чакырылышта да барлык егетләр призывник сумкасы, шәхси гигиена предметлары һәм банк картасы, мобиль телефон белән тәэмин ителәчәк. Түләүсез бирелгән телефоннар белән солдатларга аена 30 минут сөйләшү һәм 10 смс җибәрү каралган. Сроклы хезмәтнең срогында үзгәреш юк, 12 ай узасы. 

Чакырылыш комиссиясендә контракт мәсьәләсе дә күтәрелде. Бүгенге көндә Нурлат районнан бары 9 егет контракт нигезендә хезмәт итә, бу эшне җанландыру вариантлары каралды. Быел шефлыкка алынган часть– Владикавказ дизель су асты көймәсенә дә нурлатлыларны җибәрү планлаштырыла. Хәрби комиссариатта әйтүләренчә, әлегә бу частька төгәл разнарядка булмаса да, 1 егет теләк белдергән инде. 

Районның чакырылыш комиссиясе рәисе, район башкарма комитеты җитәкчесе Әсхать Габдуллин әйтүенчә, иң мөһиме, егетләрнең сау – сәламәт хезмәт итеп, туган йортларына кайтуы.