Нурия Галимова тормышны яратып яши

Фома авылында яшәүче 81 яшьлек Нурия әби Галимованың оптимистлыгыгына сокланмаган кеше юктыр, мөгаен. Бала  чагыннан ук инвалиды ул, чукрак-телсез әби ялгызлыктан интекми, төшенкелеккә дә бирелми, ә тулыканлы тормыш белән яши. Аның кебекләрнең үз дөньясы, дисәләр дә, Нурия әби башка кешеләр кебек үк яши, эшли, дин юлында да ул. Ымлыклар, кул хәрәкәтләре белән генә аралашса да, ул авылдашлары, күршеләре белән гөр килеп яшәп ята. Кайда кемгә ярдәм кирәк, Нурия әби шунда. Ул күлмәген дә тегеп бирә, йонын да эрли, бәйли дә, чигә дә, кош-кортын да асрый, бакчасын да үстерә. Каз өмәсеме, өй юарга кирәкме – Нурия әби бу эшләрдә дә ярдәм итеп торырга өлгерә. Нурия әбинең мондый оста куллыгы, җитезлеге һәм тормышны яратып яшәве әнисе Кәримәдән күчкән икән... 

Статистикадан күренгәнчә, планетабызның һәр тугызынчы кешесе чукрак һәм телсезлектән интегә икән.  Ә менә Нурия әби аны һич тә интегү дип санамый. Мәктәптә укымаса да, үзенә кирәген аңлата белә. Авылдашлары да аны яхшы аңлый, аларның игътибарына, мәрхәмәтлелегенә шөкерана итеп яши. Туганнары, якыннары әбине үзләренә чакырсалар да, нигезен ташлыйсы килми аның. 

– Гомер буе яшәгән нигеземне ничек ташлап китим инде, шөкер, әлегә саулыгымна зарланмыйм, үз аягымда, - ди әби кул хәрәкәтләре белән аңлатып. Бу көннәрдә аның өеннән кеше өзелми. Өлкәннәр ункөнлеге кысаларында мәктәп укучылары тимурчылык ярдәме оештырган, авыл җирлеге советы хезмәткәрләре бүләген керткән, концерт тамашасына да чакыралар. Әби өчен игътибар, кайгыртудан да зур бүләк юк. Шуңа да ул һәр килгән кешегә сөенеп шөкерана итеп яши.