Район башлыгы элеваторлардагы эш белән танышты

Бүген, 22 сентябрьдә, район башлыгы Равил Кузюров “Нурлат элеваторы” ЯАҖ һәм “Агропорт” ОООларында булып, производство  белән танышты. Ике оешма да  80 елдан артык ашлык саклау функциясен үти. Хәзер алар инвесторлар кулында. 

Район башлыгы “Нурлат элеватор”ына эш визитын  лаборатория, үлчәү, ашлык киптерү, чистарту блокларын һәм  складларны караудан башлады. Диспетчер кабинетында булып, элеваторның идарә пульты белән дә танышты, элеваторның 52нче катта урнашкан ячейкасын да карап төште.  Гомуми тутыру (загрузка) мөмкинлеге 98 мең тонна булган җәмгыять бүгенге көндә физик авырлыкта 47 мең тонна ашлык  кабул итеп алган. Үзебезнең 7 хуҗалыктан тыш, аксубай районы хуҗалыклары да  ашлыкларын бирегә саклауга куйганнар.  Хәзер эшчеләр бөртекләрне киптерү, чистарту эшләре белән мәшгуль. Бүген биредә 98 кешегә эш урыны бирелгән.

  Җәмгыять директоры Мансур Гайфуллин сүзләреннән аңлашылганча, биредә эшләр параллель рәвештә алып барыла. 

– Мөмкинлектән чыгып ремонтын да ясыйбыз,  ашлыкны ГОСТ таләпләренә китереп сепараторлар аша чистартып, киптереп сакларга куябыз. Хәзер яңа чистарту – киптерү башнясын реконструкцияләү белән мәшгульбез, - дип директор яңа башкарылган эшләр белән дә таныштырды. 

“Агропорт” ОООсы бүген 31 кешегә эш урыны бирә. Куәте 42 мең тоннага исәпләнгән җәмгыять бүгенгә 9200 тонна ашлык кабул итеп алган. Хәзер биредә көнбагыш килгәнне көтәләр.

Һәр ике пункт белән танышкан район башлыгы Равил Кузюров: “Игенне җыеп алу белән генә эш бетми, аны дөрес итеп саклый да белергә кирәк”, - дип объектлардан канәгать калуын җиткерде, җитәкчеләр белән производствоны үстерү буенча сөйләшү-киңәшүләр дә үткәрде.