Нурлатта горчицага сорау арткан

Горчица әлләни кирәкле товар түгел сыман. Әмма соңгы араларда горчица орлыгы Нурлатта иң тәҗел товарларның берсенә

әверелгән булып чыкты. Бу исә аның бакча эшләрендә бик яхшы ярдәмче булуы белән бәйле. Нурлатлылар аның чүп үләннәренә каршы көрәшүдә иң ышанычлы нәрсәләрнең берсе булуын аңлаганнар. Шуңа популярлыгы да арта бара. Туфрак файдаланылмый торырга һәм ачык булырга тиеш түгел – җир эшкәртү кагыйдәләренең берсе әнә шундый. Горчицаны исә бәрәңге яисә соңгы яшелчәләр утыртырга бер ай кала яки көзен уңышны җыеп алгач, апрель азагыннан сентябрь уртасына кадәр чәчәләр. Туфрак кибеп китмәсен өчен төп культураларны җыеп луга ук чәчәргә киңәш ителә. Горчица чәчәк ату белән массаны чабып алырга һәм ул шиңгәнче үк ваклап туфракка күмәргә кирәк. Орлыклары барлыкка килгәнче тотарга ярамый, чөнки бу очракта ул үзе чүп үләненә әверелергә мөмкин бит.

- Әле 90нчы елларда ук сәнәгый масштабларда сидераль культуралар кулланылган, - ди район авыл хуҗалыгы һәм азык-төлек идарәсенең производство-маркетинг бүлеге начальнигы Фаил Ивандеев. – Бу метод туфракның уңдырышлылыгын арттыра, зарарсызландыра һәм структурасын яхшырта. Яшел ашламаларның өстенлекле ягы аларның экологик чиста һәм зыянсыз булуында да. Туфракка күмелгән үсемлек

калдыклары микроорганизмнарны тукландыра. Аксымга бай яшел масса черегәндә азот бүленеп чыга, ә бу үсемлекләр өчен файдалы. Нәтиҗәдә, төрле культуралардан яхшы уңыш алырга була. Киң кулланылыш алган сидераль культураларга уҗым арышы, борчак, рапс, карабодай керә. Горчица суыклардан курыкмый һәм тиз үсә. Ул фитофтороз авыруына, каты корт, лайлалы әкәм-төкәм, борчак күбәләге кебек корткычларга каршы нәтиҗәле, шул ук вакытта баллы культура да. Хәзерге вакытта тирес табуы авыррак, шуңа да горчицаны сидерат буларак җирне ашлау өчен файдалануны халык сынап карарга булган,ә нәтиҗәсен киләсе елга күрербез.