Нурлат сайлый

14 сентябрь иртәсе шәһәрнең 9 мәктәбендә урнашкан 2333 сайлау участогында актив тавыш бирү белән башланып китте.  Иң беренче тавыш бирүче Владимир Гавриловның кулы җиңел булды:  7.30да  участокта тулы җанлылык иде инде.

– Мин “Нурлатавторанс”та эшлим, болай да иртә торырга күнеккән кеше, эшне дә иртәнге якта башкарып куярга яратам, – ди  Илгизәр Борһанов.

– Төзүчеләр дә йоклап ята торган халык түгел, иртәләдем әле мин дә, – ди “Городстрой”дан Госман Гобәйдуллин. – Киләчәгебезне сайлыйбыз бит.

Участокта бәйрәм халәте, музыка уйнап тора.  Теләгән кеше камыр ризыклары сатып ала ала. Соңрак биредә концерт программасы һәм балалар өчен спорт уеннары да каралган. Ә “Бердәм Россия” БСПсеннән һәм “ЛДПР”дан күзәтүчеләр сайлаулар барышын күз угында тота.

– Сайлаулар район һәм шәһәрдәге барлык 60 участокта да вакытында һәм тиешенчә башланып китте, – ди 40нчы Нурлат округ сайлау комиссиясе рәисе Линар Манәпов. – Халык актив, күбесе иртәнге якта сайлауны хуп күрә. Сайлауларның барышын күзәтергә  “Бердәм Россия”, “Гадел Россия”, “Коммунисты России” партияләреннән, “ЛДПР”дан күзәтүчеләр бар инде. Сайлауларның проблемасыз, халыкның әйбәт катнашында узуына ышанычыбыз зур.