Район мәктәпләрендә тантаналы линейкалар узды

Бүген, 1 сентябрь – Белем көнендә районның 34 белем бирү учреждениесендә һәм аграр техникумда  яңа уку елына багышланган тантаналы линейкалар узды. Районның 646 беренче сыйныф укучысын белем бирү учреждениеләрендә аерым тантаналылык белән каршы алдылар.

 50 яшьлек юбилеен билгеләп үткән коррекцияләүче интернат – мәктәп әлеге көнне бик зур шатлык белән каршы алды. Биредә  быел 37 миллион сумнан артыклык ремонт эшләре башкарылды. Интернат – мәктәп укучыларын һәм  коллективын бәйрәм белән котларга  һәм шатлыклары белән уртаклашырга район башлыгы Равил Кузюров та килгән иде.

- Бүгенге тантаналы бәйрәмгә  рәхәтләнеп килдем,  - дип башлады үз чыгышын район башлыгы. – Соңгы елларда Президентыбыз, хөкүмәтебез ярдәме белән мәгариф системасы актив үсештә. Агымдагы елда гына да районда 3 белем бирү учреждениесе капиталь ремонтланды. Шуларның берсе – сезнең коррекцияләүче интернат – мәктәп. Белем бирү учреждениеләре яңадан-яңа заманча технологияләр белән тулылана, уңайлыклы шартлар тудырыла.  Әлбәттә, белем сыйфатына заманча тәрбия бирүгә таләпләр дә үсә. Укучыларга яңа уңышлар,  педагогларга түземлек телим, - дип район башлыгы интернат-мәктәпкә телевизор һәм бертөркем төзүчеләргә Рәхмәт хатлары тапшырды. 

Бәйрәмгә килгән подрядчылар - “Премьер – сити” җәмгыяте генераль директоры Вячелав Панков һәм шефлары –Нурлат бораулау эшләре идарәсе вәкиле Николай Липатов дә мәктәп коллективына һәм укучыларга уңышлар теләп үз бүләкләрен тапшырдылар. Мәктәп директоры Ольга Бурнашевкая 1 сентябрьне коллектив өчен икеләтә бәйрәм дип атады. 

- Безнең хәзер балаларны тәрбияләү һәм укыту өчен барлык шартларыбыз тудырылды, - дип директор район җитәкчелегенә, төзүчеләргә рәхмәт сүзләрен җиткеде. - Без Республикада коррекцияләүче интернат – мәктәпләр арасында алга таба да лидерлык позициясен кулдан ычкындырмаячакбыз.

Бәйрәмгә килгән укучылар гына түгел, аларның әти-әниләре дә яңа тудырылган шартларга бик рәхмәтле иде. 

Район башлыгы тагы бер кат мәктәп белән танышып чыкты. “Кулай тирәлек”  таләпләрен истә тотып башкарылган ремонтка әйбәт бәя бирде. 

Уку елының беренче көненнән үк мәгариф учреждениеләрендә бердәм дәресләр дә башланды. Быел ул “Минем кече ватаным” дигән темага багышланды.