Авылларга игътибар артачак

Кичә, 24 августта, районның Биляр Озеро, Гәйтән һәм Бикүле авылларында халык җыеннары узды. Район башлыгы Равил Кузюров һәм оешма - предприятиеләрнең җаваплы затлары халык белән аралашты. 

Биляр Озеро һәм Зирекле авылларында бүгенге көндә барлыгы 1013 кеше яши. Җирлектә мәктәп, балалар бакчасы, ике фельдшер-акушерлык пункты, почта бүлекчәсе, саклык банкы филиалы,  мәдәният йортлары, китапханәләр, 3 кибет эшләп тора. Шәхси ярдәмче хуҗалыклар арта. Ә бу үз чиратында халыкны эшле итә. Бу җирлектә терлек саны  барлыгы 265 баш исәпләнә.  Авыллар урамнарын чистарту, 5нче линиягә тоташу, зиратларны тәртипкә китерү буенча да шактый эшләр башкарылган. Башкарыласы эшләр дә бар. Барлык проблемалар да программага кертелгән. Мәктәпкә капиталь ремонт 2014-2017 елларга планлаштырыла, урамнары яктырту буенча эшләр якын арада хәл ителәчәк, тулаем төрле программалар буенча киләсе елда саллы эшләр көтелә. Зирекледә мәдәният йорты 2015 ел планына кертелгән.  Район башлыгы халык белән аралашу вакытында районда, авыл җирлекләрендә башкарылган эшләргә дә тукталды.

1997 елда оешкан Гәйтән авыл җирлегендә халык җыенга яхшы кәеф белән килгән. Халыкның активлыгы да әллә кайдан күренеп тора: эш бар,  яшәеш өчен бар шартлар тудырылган, агымдагы елда 8 бала дөньяга килгән. Грант буенча трактор да отканнар, димәк, авыл урамнарын тәртиптә тоту проблема тудырмаячак. Бу җирлектә әлеге авылдан чыккан кешеләр аеруча ярдәм итә икән. Әнә, авыл юллары уңаеннан Аркадий Клементьевның ярдәмен тойганнар, хәзер часовня төзү буенча эшләр планлаштырыла. Монда да җирлек халкының активлыгы кирәк булачак. Район башлыгы әлеге җирлектәге Рус күлен төзекләндерү буенча планнарга тукталды. Авылларга игътибар арттыруны район җитәкчелеге Бикүле җирлегендә тагын бер кат ассызыклады.  Авыл җирлеге соңгы елларда киндераш проблемасы белән интегә. Быел әлеге проблеманы “Сөләйманов Ә.И.” КФХ ярдәме белән төптән хәл иткәннәр.  Монда авыллар халкы да актив булган.  Район башлыгы Равил Кузюров ярдәме белән башланган авыл юлларын төзекләндерү эше дә уңай нәтиҗә биргән.  Бу эшкә Бикүле авылының Ленин, Камал, Шоссейная урамында яшәүчеләр дә актив кушылган.  Илюткино авылында бүгенге көндә яктырткычлар урнаштыру бара.  Су проблемасы да уңай хәл ителә. Мәктәп һәм медпунктта агымдагы ремонт эшләре узган. Бу көнне һәр җирлектә узган очрашуда халык  район җитәкчелегенең ярдәмен тоюларын ассызыкладылар. Эшлисе эшләр, хәл итәсе мәсьәләләр дә җитәрлек. Район җитәкчелеге халыкны алда да актив катнашырга чакырды.