Партия проекты бурычын үти

Бүген, 24 августта, район авыл җирлекләрендә халык җыеннары дәвам итте. Район башлыгы Равил Кузюров җитәкчелегендә район службалары җитәкчеләре Заречный, Тимерлек, Елаур, Биляр-Озеро, Гәйтән, Бикүле авыл җирлекләре халкы белән очраштылар.

“Бердәм Россия” партиясенең халыкның иҗтимагый активлыгын күтәрүгә юнәлтелгән  әлеге проекты Нурлат районында да үз бурычын үти.  Очрашулар барышында район башлыгы Равил Кузюров районда соңгы елда гына социаль планда башкарылган эшләргә кыскача күзәтү ясап, һәр авыл җирлегендә торган көнүзәк проблемаларны хәл итү буенча  район җитәкчелеге алып барган вәзгыятьне җиткерде. Әйтик, Юган поселогына урам яктырткычлары кую 2015 елга билгеләнгән, Тимерлек юнәлешендәге олы юл челтәрен ныгыту мөмкинлеге эзләнә, авыл эчләрендәге юлларга килгәндә, тиздән республикада бу уңайдан кабул ителәчәк программага зур исәп тотыла. Хәзер әнә Елаурда 1800 метрда суүткәргеч сузыла. Проблемалар нигездә кече авылларда җыелган. Равил Әфраимович табигате ягыннан гаҗәеп матур урында урнашкан бу авылларны киләчәктә башка форматта файдалану нияте барлыгын да әйтеп узды. Әлбәттә, халыктан кергән сораулар да шактый булды, һәм аларның байтагына шунда ук ачыклык та кертелде. Әйтик, Заречныйдагы суның сыйфаты җәһәтеннән,  район башлыгы дүшәмбе көнне үк ТКХ ИКсы җитәкчесе Мидхәт Вәлиевка белгечләре белән тикшерү үткәрү һәм чистарту чарасын күрүне йөкләде. Хезмәт ветераны Зәйтүнә Хәбибуллинаның урман хуҗалыгы ветераннары белән очрашу үткәрсеннәр иде, дигән теләге дә быел сүздә генә калмаслык итеп тармак җитәкчеләренә сеңдерелде. Сугыш чоры балалары статусына кагылышлы сорауга да ачыклык кертелде. Ә Тимерлек авылы халкының кәрәзле элемтә юклыкка зарына каршы “Таттелеком”ның Нурлат филиалы җитәкчелеге авыл җирлекләрендә база станцияләре урнаштырылуын, киләсе елга аның Тимерлеккә килеп җитәчәген белдерде. Авылларны торгызу буенча фикерләр, җир паена, рейс автобусы графигына кагылышлы сораулар да җавапсыз калмады.

– Проблемаларны бер көндә генә чишү мөмкин түгел, әмма алар өйрәнелә, хәл итү юллары эзләнелә. Ачыктан-ачык сөйләшүгә әзер булуыгызга рәхмәт, – диде Равил Әфраимович халык белән очрашлар азагында.