Нурлат районында беренче Халык җыеннары узды

Колбай Морасага авыл эчендә юл, мәктәпне ремонтлау, аларга һәм Әмзә халкына Нурлаттан рейс автобусы йөрүе кирәк; соңгыларын һәм Иске Әлмәт авыл җирлегендә яшәүчеләрне мәктәп язмышы борчый, авыл җирлегендә даруханә булмау уңайсызлык тудыра; Чулпан яшьләре спортзал җиһазлауда ярдәм сорый, ә мәктәп укытучылары капиталь ремонттан соң җиһазларны да яңартмакчы. Кичә, 10 августта 4 авыл җирлегендә үткән Халык җыеннарында әнә шундый көнүзәк мәсьәләләр күтәрелде. Сөйләшү барышында авыл халкы сөенеп рәхмәт укырлык уңай яңалыклар да байтак булуы ачыкланды: Колбай Морасада быел республика программасы буенча 70 урам яктырткычы куелган, 5нче линия сузылган;  Иске Әмзәгә август ахырында юл салына башлаячак, Яңа Әлмәттә 2 км 700 метрда “Чиста су” программасы буенча су кертелә, Чулпанда яңа мәһабәт мәдәният йорты янәшәсендәге мәктәптә капиталь ремонт төгәлләнеп килә. Һәр авылда күпләп мал асраучыларга саву аппаратлары тапшырылуын да рәхмәт белән билгеләп үттеләр. Бүген районда халык тормышын яхшыртуга йөз тоткан 24 республика һәм федераль программа буенча эш алып барыла. Аларның байтагы "Бердәм Россия" партиясе инициативасы буенча үткәрелә. Җыеннарда катнашкан Нурлат районы башлыгы, “Бердәм Россия” партиясенең Нурлат җирле бүлеге секретаре Равил Кузюров алда торган эшләрне дә бәян итә, алар киләчәктә дә авыл халкының тормыш дәрәҗәсен яхшыртуны күздә тоткан гамәлләр: Колбай Морасада авыл эчендәге юллар планда тора, мәктәп капиталь ремонт программасына кертелгән; Әмзәдә эш урыннары булдыру уйланган, Чулпанда авыл эчендәге юлларны ремонтлау хәл ителеп килә. Әлбәттә, боларны хәл итү бер көнлек кенә эш түгел, ул төбәкне үстерү программасы нигезенә нәкъ менә халык сораулары ятачак та. Җыенда ТР Дәүләт Советы депутаты, ”Нурлатнефть” НГДУсы начальнигы  Илгиз Салиховның чыгышы халыкка депутатлар эшчәнлеге асылын ачарга булышты.”Татнефть” кебек социаль юнәлешле җәмгыять вәкиле булган депутат эшчәнлек чорында 700дән артык сайлаучыны кабул иткән, җирлекнең күп социаль проблемаларын хәл итүгә реаль өлеш кертә алган. Бу көнне дә Илгиз Салихов адресына рәхмәт әйтүчеләр шактый булды. Димәк,  халыкның үзвакытында  шундый эшлекле, сүзендә тора белгән һәм реаль эш күрсәтә алган кандидатка өстенлек бирүе нәтиҗәсен дә китергән. Чулпан авылында узган җыенда  “Агроинвест” ИК” генераль директоры Рәис Сөләймановның авыл киләчәгенә кагылышлы чыгышын да халык кызыксынып тыңлады. Чулпан авылы язмышында Сөләймановлар зур роль уйный: эш бирүче дә, проблемаларны хәл итүче дә, социаль мәсьәләләрне кайгыртучы да алар бүген.

Җыеннар эшлекле фикер алышу, проблемаларны уртага салып сөйләшү рәвешендә узды. Алар киләчәктә җирле социаль-икътисадый үсеш программаларына кертеләчәкләр, шулардан “Бердәм Россия” партиясенең киләчәк 5 елга эш программасы формалаша. Җыеннарда  халыкның кәефе дә сизелде: авыл язмышы турында кайгыртучылар бар икән, димәк, ул үсештә булачак.