Тәләгән кешегә эш табыла

Биляр Озеро авыл җирлегенең яшь  башлыгы Олег Микушкин  үзенең беренче ел эшчәнлеге хисабында авыл тормышына кагылышлы байтак саннар китерде. Алардан мәгълүм булганча, халыкны эш белән тәэмин итү чагыштырмача начар түгел. әмма авыл картая: узган ел ике авылда бары 4 бала туган, ә үлүчеләр саны 19ау булган. Докладта авылны төзекләндерү, чистарту буенча башкарылган эшләр аталды, Зирекле авылында буа төзелүе әйтелде, Җиңүнең 70 еллыгын каршылау буенча планлаштырылган эшләргә тукталды. Доклад мәктәп директоры Алевтина Граф һәм участок уполномоченные Ринат Төхфәтуллин хисаплары белән тулыландырылды. ”Сөләйманов Ә.И.” КФХсы вәкиле Ирек Хәйдәрҗанов хуҗалык эшчәнлеге нәтиҗәләре һәм пайчылар алдындагы бурычларның үтәлеше белән таныштырды. Аннан очрашу сорау-җавап формасында дәвам итте. Җыенда Зирекле авылыннан катнашучылар күп түгел иде, әмма килгәннәре кече авыл проблемаларын бик кыю күтәрделәр. Зирекле Мәдәният йортына һәм медпунктына ремонт кирәклеге турында да алар сүз кузгаттылар, мәктәпнең ябылуыннан һәм авыл медпунктында дарулар сатылмавыннан да зарланып алдылар. Җыенда катнашучы служба вәкилләре җавабыннан клуб ремонты быелга кертелгән булуы, ә ФАПны ремонтларга быел ук 100мең сум акча бүленүе мәгълүм булды. Биляр Озероның Озерная урамындагы 17 электр баганасын яңарту да 2015 ел планына кертелгән икән. Авыл эчендәге юлларны төзекләндерү өчен бары өстәмә чыганаклар кайгыртырга туры киләчәген дә җиткерделәр. Бер төркем пай ияләренең сораулары инвестор белән хәл ителәчәк, ә менә авылда эшлекле активлыкны үстерәсе бар әле, чөнки шәхси хуҗалык продукциясенә, аерым алганда сөткә хәзер сорау зур. Болар хакында очрашу ахырында чыгыш ясаган район башлыгы Равил Кузюров җиткерде һәм үз эшен башлаучыларга булышлык күрсәтеләчәген дә әйтеп узды. Халыкның көнкүрешенә кагылышлы сораулар күз угында булачак, очрашуларны исә ешрак оештырырга тәкъдим итте.