Авыл район ярдәменә исәп тота

Су белән тәэмин итү һәм мәктәпнең түбәсен ремонтлау – бүгенге көндә Богдашкино авыл җирлегендә көн кадагында торган әлеге мәсьәләләрне хәл итүне район башлыгы Равил Кузюров үз контроленә алды.
Алар бүген гражданнар җыенында башка көнүзәк темалар белән бергә яңгырады. Җыен үзе дә шул ук мәктәпнең подвалында урнашкан Мәдәният йортында үтте. Биредә бер түбә астында бер вакытта берничә социаль билгеләнештәге объект – балалар бакчасы, башлангыч мәктәп, ФАП, клуб, шулай ук ДЮСШ секциясе эшләүче спорт залы күрше булып яши. Бина бер булгач, проблема да уртак: түбәнең бар җиреннән дә су үтә, бинага  20 елга бер тапкыр да ремонт  үткәрелмәгән.
Авылда эчәргә яраклы су белән тәэмин итү мәсьәләсе дә кискен тора. Богдашкинода үзәк су системасы да, чишмәләр дә юк. Авыл халкы шәхси коеларындагы судан файдаланырга мәҗбүрләр, әмма андагы су эчәр өчен яраклы түгел. Балалар бакчасында канализация юк. Авыл үзәгеннән агучы  һәм ташу вакытында 12 йортка куркыныч тудыручы  елганың агымын үзгәртү мөмкинлеген табу сорала. Электр тапшыру линияләрен дә алмаштырырга кирәк.
Әлеге мәсьәләләр авыл җирлеге башлыгы Зоя Михайлованың докладында яңгырады, ә кайберләрен авыл кешеләре үзләре күтәрде. Алар район җитәкчелеге һәм шәхсән район башлыгы Равил Кузюровның ярдәменә өмет тотуларын әйтттеләр. Әлеге барлык сорауларның да мөһимлеген истә тотып, район башлыгы  җыеннан соң мәктәп бинасын карап чыкты һәм урында аның торышына бәя бирде.
Район башлыгы Равил Кузюровны кече ватаннарының проблемаларына битараф булмаган богдашкинолыларның актив тормыш позициясе шатландырды.  Әмма бер үк вакытта ул авыл кешеләренең шәхси хуҗалык мөмкинлекләреннән тулы күләмдә файдаланмауларын билгеләп үтте. Авылда сөт җыюны да оештырырга кирәк, чөнки ул хәзер авыл халкы җитештерә торган  төп продуктларның берсе бит.
Проблемалар, әлбәттә инде, җитәрлек, алар хәл ителә. Һәм аларны хәл итүдә еш кына халык үзе дә катнаша. Авыл җыенында да күпер төзүдә, сугышта ятып калган сугышчы якташлары хөрмәтенә куелган обелискны яңартуда ярдәм иткән авыл кешеләрен хөрмәтләделәр.