Кече авыл мәктәпләре дә заманча җиһазланырга тиеш

Әхмәт авыл җирлеге авыллары зур радиуста урнашкан булсалар да, проблемалар бер төрлерәк булып чыкты.
Бүген, 23 гыйнварда Кормыш авылы мәдәният йортында үткән җыенда авыл җирлеге башлыгы Әнәс Рәхмәтуллин отчет хисабын бик эшлекле тотты һәм башкарылган эшләр рәтендә авыллар проблемасын да атый барды. Әйтик, бүген җирлеккә караган авылларны өзеклексез су белән тәэмин итү өчен 3 су су башнясы кирәк: Аксумладагы икесе искергән, шуңа өстәп, Ерепкинода бөтенләй юк. Авыл эчендәге юллар проблемасын  халык үзе өлешчә хәл итә башлаган: Ерепкино, Аксумла, Чуваш Мәнҗесе халкы урамга кызыл кирпеч калдыклары һәм вак таш түшәгәннәр.Җыелышта Чишмә авылы эчендәге юл халык тарафыннан берничә кат күтәрелде, ахырдан район башлыгы Равил Кузюров моны бары өстәмә чыганаклар эзләп кенә хәл итеп булачак, дип җавап бирде. Аксумла авылындагы Мәдәният йортына капиталь ремонт, шәһәрдән Чишмә ягына автобус тукталышы, Чишмә янындагы тукталышны авыл эченә күчерү, авылдагы хуҗасыз этләр, Ерепкинода клуб булдыру  кебек сорауларга да җаваплар алынды. Әйтик, тукталышны күчерү мөмкинлеген ЮХИДИ һәм мәгариф бүлеге белән карап, автобуслар өчен әйләнеш мәйданчыклары буенча республика программасына кертү хәстәрен күрергә киңәш ителде. Авыл эчендә утлар булмауга, җирлек башлыгы авылларда 60 яктырткыч гамәлдә, дип җавап бирде. Әхмәт авылы урамнарына хуҗалык дуңгызларын чыгаруны тыярга, плотина янындагы сусаклагыч зона кагыйдәләренең үтәлешен ачыкларга дип килештеләр. Җыенда участок уполномоченные Рәүхәт Шәфигуллин һәм төп инвестор исеменнән чыгыш ясаган Ирек Хәйдәрҗанов хокук тәртибе торышы һәм хуҗалык эшчәнлеге нәтиҗәләре буенча кыскача хисап тоттылар. Район башлыгы Равил Кузюров барлык сорауларның да контрольгә алыначагын әйтеп,  су белән тәэмин итүче идарәче компаниягә тотрыклы хезмәт күрсәтү турында ныклабрак кайгырту кирәклеген искәртте. Кече авыллар мәктәпләрен  интерактив такталар, Интернет белән тәэмин итү зарурлыгына басым ясады. Ә шәхси ярдәмче хуҗалыкларны киңәйтергә теләгән һәркемгә ярдәм булачагын  ышандырды.
Җыелышта катнашкан район һәм шәһәр службалары үзләренә кагылган сораулар буенча ачыклыклар керттеләр.