Яңарыш сезоны кыштан башланды

2014 елда район төзүчеләрен зур эш күләме көтә.

КАПИТАЛЬ РЕМОНТ
Чапаев урамындагы ике катлы йортта капиталь ремонт узган ел ахырында ук башланды.
– Сезгә сабырлык бик кирәк булачак икән, – дим анда яшәүче хезмәттәшебезгә узган ел шәһәрдәге ике йорт ремонтлау тарихын күздә тотып.
– Юк, бездә бит Максимов егетләре эшләячәк. Алар сыналган халык, әйле-шәйле генә эшли торганнар түгел.
Шулай булып чыкты да. Иске йорт халыкка мәшәкать тудырмыйча гына күз алдында үзгәрә башлады: ике атна дигәндә, йортның түбәсен кырт иттереп алыштырып куйдылар егетләр, инде стеналарын пенопласт белән җылытып киләләр. Димәк, тиздән сайдинг белән тышлый да башлаячаклар.
– Алексей Максимовның “Нурлат-Еврострой” оешмасы, чыннан да, капиталь ремонт программасы башланган 2008 елдан бирле төп подрядчыларыбыздан санала, – диде Нурлат районы башкарма комитетының архитектура һәм төзелеш бүлеге әйдәп баручы белгече Илнур Бәхтияров. – Быел алар өч йортны капиталь ремонтлаячаклар. Чапаев ур., 1 йорттан тыш Гыйматдинов ур., 60 һәм Мәктәп ур., 50 йортлар да алар карамагында. Беренче икесендә түбә ябуны төгәлләделәр инде, стеналарны тышлауда эшлиләр.
Әнә шулай, быел ремонтланасы 11 йортның өчесе өчен җаннары тыныч районда. Хәер, подрядчылардан  капиталь ремонт белән беренче елдан ук шөгыльләнүче Наил Фазлыевның “Энергострой”, Илгиз Билдановның “Домстрой”, 2009 елдан аларга кушылган Вячеслав Овчинниковның “Новый дом”  егетләре дә сыйфат һәм срок сынавын уңышлы үтеп, шундый ышаныч яулаганнар. Алар белән бергә быел ремонт эшләрен “ПрестижСтрой” (Рәфис Шәмсуаров) һәм СК “Лидер” (Алексей Вастурков) та алып барачаклар.

Капиталь ремонт программасы эшли башлаганнан бирле районда ремонтланган йортлар саны:
2008 ел–19
2009 ел–40
2010 ел–16
2011 ел–10
2012 ел–12
2013 ел–12

– Быел подрядчыларны бик сайлап алырга тырыштык, –  дип дәвам итә сүзен Илнур Исламович. – Узган елгы хәлләр яхшы сабак булырлык иде бит. Сүз уңаеннан, “Строитель” быел ремонтта катнашмый. Эшнең сыйфатына  контроль дә кырысланачак, торак милекчеләре ширкәтләреннән дә зур таләпчәнлек соралачак. Әмма ремонт үткәрелә торган йортларда яшәүчеләрнең үзләренә дә битараф булмаска, кимчелекләрне үзвакытында күрсәтергә  кирәк. Элеккечә үк төп контролер булып халык үзе калачак.
Бу шулай булырга тиештер дә, чөнки район төзүчеләренә быел да эшне берничә тармакта алып барырга туры киләчәк бит. Республиканың мәктәпләргә капиталь ремонт программасына быел безнең шәһәрдәге 3нче урта мәктәп (“Еврострой”), Чулпан (“Энергострой”) һәм Түбән Чаллы (“Домстрой”) авыл мәктәпләре керә (соңгысы-программага өстәмә рәвештә). 12 фельдшер-акушерлык пунктына  республика программасы нигезендә ремонт өчен 100әр мең сум акча бүлеп биреләчәк. Ә менә Мамык табиблык амбулаториясенә капиталь ремонт үткәреләчәк.

ТӨЗЕЛЕШ
2014 ел төзелешләргә дә бай булырга күренә. Якты Күл авылында 200 урынга клуб төзелешен “Перспектива” ОООсы (Ә. Гайнуллин) башлаган да инде. Чуваш Мәнҗесе һәм Вишневая Поляна авылларында модульле ФАПлар бастыру күздә тотыла. Киекле авылында 50 урынга балалар бакчасы төзү белән “Городстрой” (С.Мөлеков) шөгыльләнәчәк. Аларга әле Кизләү авылында  участок уполномоченные өчен йорт төзү дә йөкләнгән. Мамыкта исә шундый йортны СК “Лидер” төзиячәк. Әлбәттә, торак төзү күләме дә кимеми, агымдагы елда Нурлатта 26 мең кв. метр торак файдалануга тапшырылырга тиеш. Кариев урамындагы 45 фатирлы йортта  “Перспектива” һәм 20 фатирлысында “Городстрой” эшне башлаганнар инде. Сүз уңаеннан, төзелеш оешмаларының һәрберсе әлегә үз әйләнеш средстволарына эш алып баралар, бу исә аларга срокларны кулдан ычкындырмаска, халыкны да эштән өзмәскә мөмкинлек бирә.

ИНФРАСТРУКТУРА
Алда атап киткән объектлардагы эшләр–барысы да диярлек республика яки федераль программалар аша финанслана. Шул ук вакытта программадан һәм бюджеттан тыш акчаларга башкарыласы эшләрне дә атарга кирәктер. Болары–район башлыгы Равил Кузюровның республика аша шәхси юнәткән средстволарына башкарылачак. Район башлыгы сайлау алды программасында вәгъдә иткәнчә, йорт яны территорияләрен тәртипкә китерү өчен республикадан 50 миллион сум средство ала алган. Төзелеш бүлегендә әйтүләренчә, бу 70ләп йорт тирәсен тәртипләргә мөмкинлек бирәчәк. Район башлыгы кайгыртуы белән табылган 22,4 миллион сум акча шәһәр эчендәге юлларны төзекләндерүгә, 20 млн. сум акча район үзәк хастаханәсенең акушерлык пунктын ремонтлауга тотылачак. Гомумән, хастаханәнең байтак проблемалары хәл ителергә охшый быел. Болардан тыш, әле 30 миллионга поликлиникада ремонт үткәрүне дә Равил Әфраимович кайгырткан. 3,1 млн.га хастаханә лифтын яңарту “Кулай тирәлек” республика программасы нигезендә башкарылачак.
Инфраструктураны заманчалаштыру максатыннан урам утларын торгызуга 5 млн. сум акча каралган.  Иске Чаллыда, Кизләү, Киекледә су үткәргеч линияләр сузу эшләре дәвам итәчәк. Быел әлеге зур эш Тумба һәм Яңа Әлмәт авылларында да башланачак, гомуми эшләр суммасы 13 млн. сум тәшкил итә.
Былтыр башланган өч мәктәп яны территорияләренә  спорт мәйданчыклары ясау эше быел ишәеп тәмамланачак: алар белән бергә, шәһәрнең 1 мәктәбе, Көньяк-Көнбатыш һәм Төньяк микрорайонында да шундый мәйданчыклар барлыкка киләчәк. Шәһәрнең үзәк стадионында да эш дәвам итәчәк.
Шәһәрнең яңа микрорайоннарында су, газ үткәрү өчен җирле бюджеттан  5 миллион сум акча бүленәчәк. Ике ел рәттән Татарстан Республикасы Дәүләт Советы депутаты Илгиз Салихов кайгыртуы белән “Татнефть” ААҖ авылларда су үткәрү өчен 5әр миллион сум акча бүлеп биреп килгән, быел да бу уңайдан саллы ярдәм булмый калмас, дип өметләнәләр төзүчеләр.
Күргәнегезчә, эш күләме аз түгел, һәм алар һәммәсе шәһәр һәм район халкы мәнфәгатен күздә тота.
– Эш киеренке булачак, район башлыгы Равил Кузюров эш барышын үзе контрольдә тота, һәр атнада төзүчеләр белән очрашып, проблемаларны белешә, сыйфатлы эшне төп таләп итеп куя,–диде Нурлат муниципаль районы башкарма комитеты башлыгының инфраструктур үсеш буенча урынбасары Рөстәм Карама.–Шунысы сөенечле: билгеләнгән бурычларның җитдилеген аңлаган һәм аны хәл итәрлек һөнәрмән эшче-көчебез бар, өзеклекләр тумас дип уйлыйм.
 Ә безгә исә һәр үзгәрешкә шатланып, торгызганны саклап, шәһәр-йортыбыз үсешенә кечкенә генә булса да бизәк кертү турында уйланасы гына кала. 

2014 елда капиталь ремонт ЭШЛӘРЕН башкарачак подряд оешмалары: