Район башкарма комитеты җитәкчесе билгеләнде

Сессиядә чыгыш ясаучылар: район башлыгы Равил Кузюров, кандидатларның икенчесе Габделгазиз Юнысов, Биляр Озеро, Колбай Мораса, Иске Әлмәт авыл җирлекләреннән депутатлар Минкасыйм Шарапов, Рәшит Сафин, Равил Хисамов кандидатның эшлеклелек сыйфатлары, принципиальлеге, җаваплылыгы, максатчан булуы турында әйтеп, аңа тавыш бирергә чакырдылар. Шулай итеп, Нурлат муниципаль районы башкарма комитеты җитәкчесе итеп бертавыштан Әсгать Габдуллин билгеләнде. Район башлыгы Равил Кузюров аны котлап, уңышлы бердәм эшләргә, дигән теләк белдерде.
Әсгать Касыйм улы Габдуллин
1966 елда ТАССРның Аксубай районы Түбән Татар Майнасы авылында туган.
Хезмәт юлын 1983 елда комбайнчы ярдәмчесе булып башлаган. 1984-86 елларда Совет Армиясендә хезмәт иткән. 1987-91 елларда Казан авыл хуҗалыгы институтында укыган.1993-97 елларда Аксубай районының “Уңыш” колхозында агроном, 1997-2004 елларда шул ук районның “Майна” күмәк хуҗалыгы рәисе булып эшләгән. 2004-2006 елларда Аксубай районы авыл хуҗалыгы һәм азык-төлек идарәсе начальнигы- район хакимияте башлыгы урынбасары булган. 2006-2008 елларда Алексеевск районында “Алексеевск финансисты” ААҖ филиалы директоры вазифасын башкарган. 2008 елдан  аның хезмәте “Восток-Зернопродукт” ЯАҖ белән бәйләнгән: 2013 елның сентябренә кадәр ул Биләр филиалы төбәк идарәсе идарәсе директоры, ә бүгенге көнгә кадәр “Кызыл Шәрыкъ Агро” ААҖнең Биләр төбәк идарәсе директоры булып эшләгән.
Сессиянең икенче көн тәртибе буенча Нурлат районы финанс-бюдҗет палатасы рәисе Гөлфия Нуруллина чыгыш ясады. Ул Нурлат муниципаль районы үсеш фондының эше турында хисап тотты, шунда ук депутатлар Фондның яңа башкарма директорын сайладылар. Бу эш Гүзәл Мөхәммәтҗановага йөкләнде.
Сессиядә Татарстан Республикасы Дәүләт Советы депутаты Марат Хәйруллин да чыгыш ясады. Ул Нурлат районының яңа җитәкчелеген котлап, аларга районны алдынгы заманча төбәк итәргә, дигән теләк белдерде, быелгы мөһим сәяси вакыйга–ТР Дәүләт Советына сайлаулар темасына кагылып алды. Аны уңышлы үткәрү халыкның хакимияткә ышаныч күрсәткече дә булып тора, дип ассызыклады.
Сессияне район башлыгы Равил Кузюров алып барды. Соңыннан бер төркем лаеклыларга хөкүмәт һәм тармак бүләкләре тапшырылды.