Нурлат мәктәбендә курсант белән очраштылар

4нче мәктәптә Ярославльдәге Можайск исемендәге Хәрби-космик академия филиалы курсанты Әнвәр Лаишев белән очрашу үтте.
Әнвәр Ярославльдә беренче елын укый, Нурлатка яңа ел каникулларына кайткан булган. Һәм мәктәпнең тормыш иминлеге нигезләре дәресен укытучы Марс Зәйниев чакыруы буенча очрашуга килгән. Өстәвенә, Әнвәрнең хәрби юл белән китүендә Марс Миһмангировичның йогынтысы да булган икән. Нәкъ менә ул узган ел өлкән сыйныфларда очрашу уздырганда, әлеге академия турында сөйләгән. Анда зенит-ракета һәм радиотехник частьлар һәм подразделениеләр өчен офицерлар, автоматлаштырылган системалар инженерлары әзерлиләр. Әнвәр нәкъ менә инженерлык белгечлеген сайлый да. Ул укучылар белән үзенең укуы турындагы тәэсирләрен уртаклашты.
– Башта өйне сагындым, әмма акрынлап яңа тормышка кереп киттем. Яшь сугышчы курсын уздым, һәм шуннан соң укып чыгарга, белгечлек алырга дигән катгый карарга килдем. Хәрби хезмәттән соң мин гражданлык авиациясендә дә кала алам. Гомумән, хәрби училищеда укуым белән горурланам, – ди Әнвәр.
Улларының омтылышын әти-әнисе дә хуплый. Очрашуда Әнвәрнең әнисе Гөлмирә дә катнашты. Тору урыны, яшәү, көнкүреш шартлары – барысы да бер дигән дәрәҗәдә. Әнвәр укырга БДИ нәтиҗәләре буенча керә, укуы түләүсез.
Очрашу малайларда да, кызларда да көчле тәэсирләр калдырды. Шунда ук әлеге академиягә укырга керергә теләк белдерүчеләр дә табылды. Хәтта кызлар да мондый мөмкинлек турында уйлана башладылар, өстәвенә, академиядә алар өчен дә төркем бар икән. Нурлат районыннан 2013 елда Егоркино егете Михаил Осипов та әлеге академиягә укырга кергән.
Шунысын да әйтик, 4нче мәктәптә мондый очрашулар матур гадәткә әверелгән. Моңа кадәр Казан Суворов хәрби училищесы курсанты Владислав Чубенко килеп киткән, ул әлеге уку йортына 4нче сыйныфтан соң ук кергән булган.
– Балаларның кая укырга бару мөмкинлеге булуы турында белеп торулары бик мөһим. Мондый очрашулар уку йортларын реаль рәвештә күзалларга булыша. Укучылар хәрби училищеларга укырга керүнең бернинди куркынычы да юк икәнлеген аңлыйлар. Әнвәр дә әнә үсеп, җитдиләнеп кайткан, мөстәкыйль егеткә әверелгән. Бу бик шәп бит, – ди Марс Зәйниев.