Халыкка дөрес һәм объектив мәгълүмат җиткерелергә тиеш

Бүген, 14 гыйнварда “Татмедиа”   матбугат һәм массакүләм коммуникацияләр агентлыгының еллык киңәшмәсендә катнашкан Татарстан Республикасы Президенты Рөстәм Миннеханов җурналистлар алдына иң беренче итеп шундый бурыч куйды. Агентлык җитәкчесе Ирек Миннәхмәтов, “Татмедиа” ААҖ генераль директоры Фәрит Шаһиәхмәтов узган елгы эшчәнлеккә йомгак ясап, агымдагы елга тармак эшчәнлеген тагы да камилләштерү буенча бурычлар билгеләделәр. Киңәшмә хөкүмәт бүләкләре тапшыру белән төгәлләнде. Татарстан Президенты кулыннан озак еллар нәтиҗәле хезмәте өчен бүләк алучылар арасында “Нурлат” ТРКсы директоры Резеда Гиняева да бар иде. Бу көнне коллегабызга “ Татарстан Республикасының атказанган матбугат һәм массакүләм коммуникацияләр хезмәткәре” дигән исем бирелде.