Ванчуриннар формуласы буенча зур һәм тату гаилә

Мамыктан Оксана һәм Сергей Ванчуриннар гаиләсе турында район газетасында күп тапкырлар язганнары бар инде. Һәм һәрчак без алар турында ниндидер яңа нәрсәләр белә торабыз.
Әлеге гаиләнең энергиясе һәм көр күңеле беркайчан да саекмас сыман. Чынлап та, балалар тәрбияләү – олы хезмәт бит. Кайбер ата-аналар үз балаларын да тиешенчә кайгыртып яши алмаган бер вакытта – бигрәк тә. Әлеге гаиләдә 11 бала тәрбияләнә. Аларны ашатып тору – үзе үк зур хезмәт. Моннан тыш, Ванчуриннар терлек тә асрыйлар, аларның җирләре дә бар, ә аны һәрчак эшкәртеп торырга кирәк. Әмма биредә эштән курыкмыйлар. Оксана – бик җитез, тере ханым. Балаларның күбесе мәктәптә укый инде. Ул аларны кайгыртып яши, мәктәптә еш була, уңышлары белән кызыксына. Һәр баласына назлы сүзләрен таба белә. Балалар алдаша белми бит. Аларның үзләрен  тәрбиягә алган әти-әниләренә мөнәсәбәтләре безнең күз алдында. Әлеге гаиләдә аңлашу хөкем сөрә. Әниләре балаларын яклый. Моннан тыш, бу гаиләдә балаларны хезмәткә дә өйрәтеп үстерәләр. Шулай итеп, балалар мөстәкыйльлекә өйрәнәләр. Аларның һәркайсының үз вазифасы бар. Үзара тату яшиләр, бер-берләрен кайгыртып торалар, өлкәннәре кечерәкләрен карый. Боларның барысы да беренче чиратта әти-әнинең казанышы, әлбәттә. Оксана ата-аналар комитеты әгъзасы да әле. Мәктәп тормышында актив катнаша. Моннан тыш, әлеге гаилә даими рәвештә мәктәпкә иганәчелек ярдәме дә күрсәтә. Мисал өчен, алар мәктәпкә үзләренең шәхси хуҗалыкларыннан сөт бирәләр. Ә начар тәэмин ителгән гаиләдә яшәүче 5 балага Яңа ел алдыннан татлы бүләкләр дә ясадылар әле. Бу аларның балаларга булган олы мәхәббәте турында сөйли. Минемчә, аларның кешеләргә кылган игелекләре киләчәктә  үзләренә йөзе белән әйләнеп кайтыр. Әлеге гаиләдә бары тик шатлыклы мизгелләр генә булып торсын иде. Алар моңа лаек.