Яңа елда нурлатлыларны да яңалыклар көтә

Яңа елның беренче көннәре безнең тормыш-көнкүрешебезгә төрле яңалыклар һәм үзгәрешләр алып килде. Россия территориясендә 1 гыйнвардан 200ләп норматив акт үз көченә керде, аларның күбесен тоярга өлгердек тә инде.
Сүзне яңалыкларның күңеллеләреннән башларга кирәктер. Мәсәлән, Россиядә минималь хезмәт хакының күләме 5205 сумнан 5554 сумга артачак. Әмма бу артуны халык тоярга өлгерерме, юкмы -  анысы бәхәсле. Чөнки 1 гыйнвардан алкоголь, тәмәке һәм бензинга бәяләр артырга өлгерде бит инде. Мәсәлән, моңа кадәр иң арзан аракының ярты литры 177 сум булса, хәзер ул кимендә 199 сум тора. Август аенда ул 220 сум булачак, дип фаразлыйлар. Тәмәке бәяләре хәтта бер ярым тапкырга артачак, дигән сүзләр дә бар. Әмма әлегә бәяләр арту күзәтелми, моны кибетләрдә, киоскларда  узган елгы продукциянең сатылуы белән аңлаталар. 1 июньнән исә тәмәкене киоскларда сатуны да тыймакчылар. Аның каравы, торак-коммуналь хезмәтләр өчен түләүләр әлегә шул көе кала,  үзгәрешләр 1 июльдән гамәлгә керәчәк.
2014 елдан мәгариф өлкәсендә дә үзгәрешләр булачак. Шуларның иң әһәмиятлеләреннән берсе БДИ нәтиҗәләренең элеккегечә ике түгел, ә дүрт ел гамәлдә булуыдыр, мөгаен.
- Моңа кадәр БДИ тапшырганнан соң чыгарылышлар ике ел эчендә уку йортына керә алмый калсалар, нәтиҗәләр юкка чыга һәм  укырга керү өчен яңадан имтиханнар тапшырырга кирәк иде. Ә хәзер чыгарылышларның уку йортына керү вакыты бермәбер арта, димәк, шанслары да күбрәк була. Бу мәктәпне тәмамлау белән армиягә китеп барган егетләр өчен дә яхшы булачак, - ди Нурлат районында БДИ буенча координатор Неля Гыйззәтуллина.
Салымнар буенча да үзгәрешләр көтелә. Алар нигездә бәяләре 3 миллион сумнан артыграк торган кәттә автомобильләрдә йөрүчеләргә кагыла, алар өчен салым ставкалары шактый үсә. Районара салым инспекциясенең Нурлат бүлегендә әйтүләренчә, салым ставкалары автомобильләрнең бәясенә генә түгел, егәрлегенә һәм ничә ел кулланылуына да бәйле булачак икән.
 Россиядә шактый проблемалыга әверелгән “резин” фатирлар уңаеннан да яңалыклар бар. Бу чит илләрдән килүчеләрне үзләрендә фиктив теркәүчеләргә каршы көрәш чарасы буларак кертелә. Моның өчен хәзер фатир хуҗаларын 3 елга кадәр ирекләреннән дә мәхрүм итәргә мөмкиннәр. Хәер, УФМСның Нурлат бүлеге начальнигы Зөлфирә Хисмәтуллина әйтүенчә, Нурлатта мондый проблема булмаган икән үзе. 
Яңа елдан хәрби хезмәтнең дәрәҗәсе  дә артырга охшаган. Мәсәлән, хәзер 27 яшенә кадәр нигезле сәбәпсез армия хезмәте узмаганнарны  дәүләти һәм муниципаль хезмәткә кабул итмәячәкләр. Шулай итеп, хәзер чиновник булырга теләгән яшь егетләргә башта хәрби комиссариатка барырга туры килмәгәе.
Яңалыклар исә моның белән генә бетми. Алар арасында ашыгыч ярдәм күрсәтү, кәрәзле телефоннар өчен сим-карталар сату,  пенсия реформасына кагылышлы һәм башка төрлеләре дә  бар. Кыскасы, сөенергә дә, көенергә дә сәбәп җитәрлек!