Салдакай авылында «Роза әби коесы»н яңарттылар
Түбән Камада яшәүче Гүзәл Башурова әнисе истәлегенә чишмә төзекләндерү өчен 250 мең сум акча бүлеп биргән.
Салдакай авылында яңартылган «Роза әби коесы»н ачу тантанасы булды. Түбән Камада яшәүче Гүзәл Башурова әнисе истәлегенә чишмә төзекләндерү өчен 250 мең сум акча бүлеп биргән.
"Бу коеның тарихы бик дулкынландыргыч. Безгә авыл җирлегенә Түбән Камада яшәүче Гүзәл Әгдәс кызы Башурова туган авылы үсешенә зур өлеш кертү теләге белән мөрәҗәгать итте. Халык белән киңәшләшкәч, без аңа мәчет янындагы коены торгызырга һәм төзекләндерергә һәм аны әнисе хөрмәтенә "Роза әби коесы"дип атарга тәкъдим иттек. Гүзәл Әгдәсовна бу идеяне хуплап, 250 мең сум акча бүлеп бирде, ә торгызу эшен авылдашыбыз Хәлил Йосыпов бик тырышып һәм сыйфатлы башкарды", - дип уртаклашты Якушкино авыл җирлеге башлыгы Хасибулла Хәмидуллин.
Коеларны һәм чишмәләрне төзекләндерү-ул инфраструктураны саклау гына түгел, ә безнең хәтерне һәм күркәм традицияләрне торгызу. Элекке заманда авыл халкы бирегә һәрвакыт чиста су алырга килә, очраша, аралаша һәм яңалыклар белән уртаклаша иде. Битараф булмаган кешеләр аркасында авылда тагын бер уңайлы урын — Салдакайның чын бизәге барлыкка килде.
Кое гына үзгәрмәгән, территория дә төзекләндерелгән: пөхтә итеп койма белән әйләндереп алынган, матур чәчәкләр утыртылган һәм брусчатка түшәлгән, барлык авыл халкы һәм кунаклар өчен уңайлы зона булдырылган. Башкарма комитет торгызылган коены чын бәйрәм итеп ачарга карар кылган. Хәлил Йосыповның иганәчелек ярдәме белән тантана оештырылды, анда авыл халкы, Роза әбинең туганнары, тирә-як авыллардан, шулай ук республика шәһәрләреннән төрле милләт кунаклары җыелды.
Чарада табигать чыганакларын саклауның, коеларны карап тотуның һәм туган авылларына ярдәм итүнең мөһимлеге турында чыгышлар яңгырады. Бәйрәм рухын төрле телләрдәге күңелгә үтеп керерлек шигырьләр һәм җырлар тулыландырды.
Уңайлы мохит булдыруга һәм район территориясен төзекләндерүгә зур өлеш керткән өчен Гүзәл Башуровага һәм Хәлил Йосыповка Нурлат районы башлыгы Дамир Ишкинеевның Рәхмәт хатларын һәм кыйммәтле бүләкләр тапшырдылар. Инвестор Мирас Нуриҗановны һәм фермер Зөфәр Хәмидуллинны Мактау грамоталары һәм истәлекле бүләкләр белән бүләкләделәр. Әлеге игелекле проект туган якка мәхәббәт һәм уртак тырышлык белән матурлык тудыруның, традицияләр саклануның һәм авыл тормышының үзгәрүенең ачык мисалына әверелде.