НУРЛАТ БАЛКЫЙ, НУРЛАТ БИЗӘНӘ

Төнге Нурлатның сихри утлары, бизәлгән чыршылары, кардан ясалган фигуралары шәһәрлеләрне генә түгел, читтән килгән кешеләрне дә таң калдырырлык. Әнә, кыл үзәктә бар мәйданны яктыртып “Нурлатнефть” НГДУсы балкып утыра, арырак – Нурлат бораулару эшләре идарәче, “ТНГК-Нургис”, “Нурлат УТТ”сы бизәлеше белән сокландыра. Шәһәрнең көньяк-көнбатышында “Нурлатгаз” ЭПУсы каршындагы әкияти шәһәрчекне карарга әллә кайлардан балалары белән киләләр, “Нурлатнефтепродукт” каршындагы кар Кыш бабай да бизәкләрне кызганмаган. Ленинград урамы буйлап атласаң, “ТатРИТЭКнефть” ТППсы фантазиясе әсир итәрлек. Ә “Нурлат” ТРКсы шәһәрдә иң беренче булып тирә-ягын төрле утларга күмде. Нурлат картлар һәм инвалидлар интернат-йорты ишегалдындагы кар җәнлекләр дә үтеп йөрүчеләрне туктап карарга мәҗбүр итәрлек. Шикәрчеләр микрорайоны һәм Яшьлек бистәсе чыршылары яныннан төне буе бала-чага өзелми. Бизәлгән транспорт боҗралары да шәһәргә бәйрәм төсе биреп тора. Шәһәрне Яңа елга бизәү буенча комиссия боларны канәгатьлек белән билгеләде, әмма алар күзеннән караңгылыкка күмелеп утырган кече бизнес субьектлары  һәм учреждениеләр дә читтә калмады. Җиңүчеләр исемнәре шәһәр Чыршы бәйрәмендә игълан ителәчәк. Ә әлегә Нурлатка бәйрәм төсе, Яңа ел кәефе бүләк иткән һәркемгә – афәрин!