Балаларга Әкият-тамаша

Кичә һәм бүген  Мәдәният сараенда узган район башлыгының Яңа ел чыршы бәйрәмнәрен 1000 бала тамаша кылды.
“Золушка” театрлаштырылган тамашасына районның ятим һәм инвалид балалары, уку һәм спорт алдынгылары, республика, район конкурслары җиңүчеләре, талантлы, аз керемле гаиләләр балалары чакырылган иде. Мавыктыргыч геройлар белән бергәләшеп балалар серле әкият дөньясын гизделәр.
Мәдәният сараенда узган  чарада  район башкарма комитеты җитәкчесе урынбасары Рәмзия Сингатуллина балаларга район башлыгы Равил Кузюровның котлау сүзләрен җиткерде. Аларның һәркайсына район җитәкчесе Равил Кузюров исеменнән татлы бүләкләр дә тапшырылды.
 Яңа ел алдыннан күрсәтелгән тамаша балаларга зур бүләк булды.  Әкиятне Мәдәни үсеш үзәге каршында эшләп килүче “Калейдоскоп” миниатюралар халык театры һәм Балалар сәнгать мәктәбенең хореография бүлеге  әзерләгәннәр иде. Театрның сәнгать җитәкчесе Валентина Голубева әйтүенчә, тамашаны әзерләү өчен ике ай вакыт кирәк булган, анда 300ләп кеше катнашкан. Махсус сәхнә костюмнары тегелгән, декорацияләр ясалган.
- Мондый проектлар 6 ел рәттән үткәрелә, - ди Валентина Голубева. –  Балалар шул еллар эчендә “Кызыл калфак”,   “Буратино”, “В тридевятом царстве”, “Бременские музыканты”, “Золушка” рус халык әкиятләрен карадылар.  Әкият геройлары белән бергәләп күңел ачтылар, төрле уеннар уйнадылар.
Районда чыршы бәйрәмнәре күп бала өчен шатлык бүләк итте быел. Игелекле гамәлне районда  иң беренчеләрдән булып 24 декабрьдә “ТатРИТЭКнефть” башлап җибәрде. Бу көнне райондагы күпбалалы һәм “Гармония” халыкка коплекслы социаль хезмәт күрсәтү үзәгендә патронатта торучы гаиләдәге  400 балага смурфиклар турындагы театрлаштырылган тамаша күрсәтелде һәм Кыш Бабай бүләкләре тапшырылды. Оешма-предприятиеләрдә һәм балалар бакчаларында да Чыршы бәйрәмнәре дәвам итә.