ДӘҮЛӘТ ПРЕМИЯСЕНӘ ЛАЕК БУЛДЫ

Бу көннәрдә “Нурлатнефть” НГДУсы начальнигы Илгиз Салихов фән һәм техника өлкәсендә Россия Федерациясе Дәүләт премиясе лауреаты исемен алу уңаеннан котлаулар кабул итә.
Мондый мәртәбәле бүләккә Илгиз Мисбахович югары үзлелектәге нефть ятмаларын эшкәртү технологияләре комплексын  эшләү һәм сәнәгый кулланышка кертү өлкәсендә зур хезмәтләре өчен лаек булды. 18 декабрьдә Мәскәүдә, Россия Федерациясенең Хөкүмәт йортында лауреатларга премияләрне тантаналы тапшыру үтте. Лауреатлар исемлегендә “Татнефть”нең җаваплы хезмәткәрләре дә бар иде.
Шунысын да өстик:  Илгиз Салиховның икенче тапкыр Дәүләт премиясе алуы инде бу. 1999 елда “Татарстанның авыр табыла торган нефть запаслары ятмаларының нефть бирүчәнлеген арттыру буенча  технологияләр комплексын эшкәртү һәм киң сәнәгый кулланышка кертү” темасы буенча хезмәтләре өчен ул  фән һәм техника өлкәсендә Татарстан Республикасы Дәүләт премиясенә лаек булган иде.