Нурлатта Россия Федерациясе Милли гвардия гаскәрләре көне уңаеннан митинг узды
Эчке гаскәрләр сугышчыларына куелган һәйкәл янына «намус» һәм «Ватан» сүзләре буш аваз булмаган нурлатлылар: хезмәт ветераннары, махсус операциядә катнашучылар, волонтерлар, активистлар һәм иҗтимагый оешмалар вәкилләре, шулай ук битараф булмаган шәһәр халкы җыелды.
Һөнәри бәйрәмгә багышланган митинг (элек ул эчке гаскәрләр көне дип аталган), көн саен илнең хокук тәртибе һәм иминлеге сагында торучыларга тирән хөрмәт символы булды.
Тантананы Нурлат районы башлыгы Дамир Ишкинеев ачып җибәрде. Үз чыгышында ул Росгвардия сафларында хезмәт итүнең аеруча әһәмиятле булуын билгеләп үтте һәм сугышчыларга антларына тугры булулары өчен рәхмәт белдерде.
Рәсми өлеш бүләкләү тантанасы белән дәвам итте: батырлык күрсәткән нурлатлылар намуслы хезмәтләре, махсус хәрби операциягә ярдәмнәре, яшьләрне патриотик тәрбияләүгә керткән өлешләре өчен лаеклы бүләкләр һәм Рәхмәт хатлары алдылар.
Котлау сүзләре шулай ук шәһәр һәм район хәрби комиссары Заһир Абдуллин, сугышчан хәрәкәтләр ветераны, батальон командиры Альберт Мөхәммәтов, «Хәрби туганлык»ның җирле бүлекчәсе җитәкчесе Зиннур Мотаһиров һәм башкалар тарафыннан яңгырады.
Чыгыш ясаучылар билгеләп үткәнчә, бүген милли гвардия сугышчылары үзләреннән алда килгәннәрнең данлы традицияләрен дәвам итәләр, ныклык һәм профессиональлек күрсәтәләр.
Митингта катнашучылар хезмәт бурычын үтәгәндә үз гомерләрен биргән геройларны бер минут тынлык белән искә алдылар, шулай ук һәйкәл итәгенә чәчәкләр куйдылар.