Укучылар робот ясый

Нурлат гимназиясе агымдагы уку елыннан фәнни-техник иҗат мәйданчыгы базасына әйләнде.
Бүген биредә  фәнни-техник иҗатның дүрт юнәлеше бар: робототехника, судомоделирование, электроэнергетика һәм легоконструирование буенча 60 бала шөгыльләнә. Гимназиянең 7Б сыйныфы укучысы Булат Фәйзуллин детальләрдән, төрле двигательләрдән җыелган роботын конкурска җибәрергә дә әзерләгән инде.
- Кечкенәдән легоконструкторлар җыярга ярата идем, - ди Булат. –  Аннан математика фәне бик ошый. Мәктәптә мондый мөмкинлек тудырылгач, бик шатланып йөри башладым. Киләчәктә инженер-механик һөнәрен сайламакчы булам.
Гимназия  узган ел “Мәктәп – дәресләрдән соң” проектында катнашып сайлап алу турын уза. Һәм биредә 4 юнәлеш буенча эш башлана. Грант акчаларына  җиһазлар сатып алына.
- Балаларны техник юнәлешләргә тарту – замана таләбе, - ди мәктәп директоры Владимир Кашкаров. – Иң элек бу үсмерне урамда йөрүдән тыя һәм иҗади мөмкинлекләрен үстерергә булыша. Аннан бала тормышындагы тагын иң мөһим нәрсә -  техник белгечлекле һөнәр сайларга ярдәм итәчәк.
Гимназия базасында проектны гамәлгә ашырырга бөтен шартлар да бар.
- Районда фәнни-техник иҗат мәйданчыгы базасы ачу өчен гимназия бар таләпләргә дә туры килде. Биредә бүлмәләр, мәйданчыклар бар, һәм, иң мөһиме, анда техник юнәлешне белгән ир-ат педагоглар эшли, - ди район мәгариф бүлеге җитәкчесе Габделгазиз Юнысов. – Мисал өчен, робототехника юнәлешендә информатика укытучысы Алексей Фадькин, судомоделированиедә технология укытучысы Фәнис  Гаязов, электротехникада Хәлим Әлимов, легоконструирование түгәрәгендә башлангыч сыйныф укытучысы Люция Ногманова эшли.  Гимназия укучылары белән беррәттән, база мәйданчыгында  район мәгариф учреждениеләренең тулы сыйныфлары шөгыльләнә. Моннан тыш, педагоглар өчен дә өйрәтү семинарлары уза. База мәйданчыгы сентябрьдә генә эшли башласа да, нәтиҗәләр күзгә күренерлек. Ике-өч көн эчендә 7нче сыйныф укучылары һөнәри дәрәҗәдәге роботлар җыя башладылар. Алай гына да түгел, конкурсларга да әзерлиләр. Әйтик, бу айда  “Легоробот һәм Мин” дип аталган фестивальгә җыенабыз,  моннан тыш, “XXI гасыр Кулибины” республика слетына һәм “Мин – мастер” дип аталган республика конкурсына эшләр тәкъдим ителәчәк.
Әнә шулай, “техникларның” планнары зурдан. Алар әлеге проект кысаларында Нурлат укучыларыннан проектчылар, эзләнү-тикшеренүчеләр, конструкторлар һәм җитештерүчеләр әзерләргә җыеналар.