Тату һәм бердәм яшик

Соңгы арада республикабызда дүрт христиан чиркәвенә ут төртү очрагы теркәлде. Зыян күрүче гыйбадәт йортлары асылда керәшен татарларыныкы булган. Республикадагы әлеге хәл уңаеннан Нурлат районы дин әһелләренең дә әйтер сүзләре бар, һәм алар милләтара дуслыкны һәм туганлыкны саклап калырга чакыра.
Иерей Ростислав, Серафим Саровский приходы настоятеле:
– Безнең диннәр диндарлар акчасына төзелгән храмнар һәм мәчетләрдә Ходай белән аралашу аша тынычлыкка һәм дини камиллеккә ирешүгә чакыра. Дини йортларга карата вәхшилек кылу – диндарларның хисләрен рәнҗетү ул, һәм бу гамәлдә гаеплеләр киң җәмәгатьчелекнең кырыс хөкеменә лаек.
Республикабыз территориясендә яшәүче мөселманнар, православие һәм башка дин вәкилләренең гасырлар буена сузылган милләтара мөнәсәбәтләрен бозуга корылган провокация чаралары һич тә башка сыярлык хәл түгел.
Бернинди деструктив көчләр дә, нинди генә милли һәм дини киемнәргә төренмәсеннәр, безнең милли һәм мәдәни мөнәсәбәтләребезне боза алмый. Тыныч һәм бердәм булырга, радикаль юнәлешләргә каршы тору эшендә хокук саклау органнарына һәрьяклап ярдәм итәргә кирәк. Барлык диндарларны һәм районыбыз халкын әлеге тискәре юнәлешләргә каршы бергә көрәшергә чакырам. Игелекле кешеләрнең бердәм ярдәме белән зыян күргән объектлар тиз арада торгызылыр дип ышанам.
Айрат хәзрәт Әюпов, Нурлат районы мөхтәсибе:
– Кызганычка каршы, вәхшилек һәм экстремизм очраклары безнең республиканы да читләтеп үтми. Коръән Кәримдә Аллаһы Тәгалә: “Башка диннәрне хурлама. Башка диннәргә кул сузасың  икән, синең динеңне дә хурларлар”, - дип әйтә. Үзен мөселман дип атаган кеше мондый вәхшилеккә бармый. Чөнки без, мөселманнар, Аллаһы Тәгаләгә, китапларга, фәрештәләргә һәм диннәргә Иман китерәбез.
Соңгы арада республикабызда христиан чиркәүләренә ут төртү сәбәпле, район мөхтәсибәте исеменнән  борчылу белдерәбез. Дин йортларына карата мондый вәхшилек республикабыздагы милләтара, динара дуслыкны таркату уңаеннан эшләнә дигән шик бар. Без, дин әһелләре, мондый конфессияара  мөнәсәбәтләрне бозуга корылган провокация чараларына катгый рәвештә каршы. Безнең динара мөнәсәбәтләрне, дини һәм мәдәни кыйммәтләребезне бернинди деструктив көчләр дә боза алмаячак. Безгә бу очракта да  провокацияләргә бирешмичә, сабыр һәм бердәм булырга кирәк. Шул очракта гына дини радикализм очракларына каршы көрәшә алачакбыз, зыян күргән дин йортларын яңадан торгызып булачак.