Юллар кар-боздан арындырыла

Узган шимбәдән башлап шәһәр юлларына кар чистарту техникасы чыкты. “Төзекләндерү биш” җәмгыяте бозлавыкка каршы материалны быел ике тапкырга күбрәк әзерләгән.
– Юл службалары оператив эшкә керештеләр, - дип хәбәр итәләр шәһәр башкарма комитетында. – 29 ноябрьдән шәһәр эчендә биш махсуслаштырылган техника кизү тора. Барлык юл службалары да кышны тулы әзерлек белән каршы алдылар.
“Төзекләндерү биш” җәмгыяте шәһәр юлларын чистартуны кичке 10нан иртәнге 6га кадәр оештыра. Шәһәр эчендәге 120 километр юлның беренче чиратта машиналар иң күп йөри торган урыннарын чистарталар.
– Беренче карга һәркем сөенә инде, ә менә безнең өчен эш арта, - ди җәмгыятьнең башкарма директоры Олег Сурков. – Кар-бураннарны тулы әзерлек белән каршы алабыз. Быелгы сезонда шәһәр юлларын карап торуга 19 техника, 30 хезмәткәр тартылачак. 600 тонналап тозлы-комлы катнашма әзерләнде. Шунысын әйтик: елдан-ел шәһәр юллары арта, без Тарн-Варннан алып Югары Нурлат һәм Түбән Нурлатка кадәрге юлларны карап торабыз. Тиздән карны полигонга чыгара башлаячакбыз. Көн дәвамында шәһәр юлларына тозлы-комлы катнашма сибәбез. Аннан махсус щеткалы техника юлларны себереп чыга.
Ә менә район юлларын карап торучы Нурлат автоюллар идарәсе үз карамакларында булган 320 километрдан озынрак юлны кышын карап тоту өчен 39 берәмлек техника, барлыгы 2400 тонна ком, 974 тонна тоз әзерләгән.
Синоптиклар хәбәр итүенчә, алдагы көннәрдә һава торышы түбәнәячәк һәм талгын буран көтелә.  Температура –10...–12 градус булачак.
– Явым-төшем арту белән эш ике сменада оештырылачак, - ди башкарма директор. – Без алга куелган бурычны җиренә җиткереп башкарып чыгар өчен бар көчебезне куячакбыз.