Мәктәпләр мәйданга чыкты

Узган атнада районда тәүге Мәктәпләр спартакиадасына старт бирелде.
Әлеге Спартакиадада 6-8нче сыйныф укучылары көч сынашачак. Бу чара исә үз эченә унике җәйге һәм кышкы спорт төрләрен ала. Бүгенге көндә укучылар бадминтон, җиңел атлетика, милли көрәш һәм йөзү ярышларында иң көчлеләрне ачыкладылар инде. Хәзер волейбол, баскетбол, хоккей, чаңгы узышлары, тимераяк спорты, чаңгы, “Көмеш тимераяк “эсафеталары, спорт ориентлашуы кебек төрләрдә ярышасы калды. Спартакиаданы тантаналы ачу 21 ноябрьдә гимназиядә булды. Анда район мәгариф идарәсе начальнигы Габделгазиз Юнысов яшь спортчыларга мөрәҗәгать итеп, аларның тәүге Мәктәпләр спартакиадасында беренче катнашучылар буларак тарихка кереп калачакларын әйтте.
Оештыручылар – район башкарма комитетының яшьләр эшләре һәм спорт бүлеге һәм мәгариф идарәсе вәкилләре әйтүенчә, Спартакиада нәкъ бер айга сузылачак икән.
– Спартакиаданың муниципаль этабы 21 декабрьдә төгәлләнәчәк. Аннан барлык ярышларның нәтиҗәләре буенча авыл һәм шәһәр укучыларыннан торган ике җыелма команда тупланачак, – ди мәгълүмати-методик үзәк методисты Ленар Әһлиуллин. – Ул командалар исә башта зона ярышларында, аннан да узсалар, республика этапларында Нурлат данын яклаячак.
Шунысы сөенечле, Спартакиаданы укытучы-тренерлар да, укучылар үзләре дә бик хуплап каршы алды. Мисал өчен, балалар-үсмерләр спорт мәктәбендә узган милли көрәш һәм йөзү ярышларында гына да 23 мәктәп катнашты.