Нурлат районы Башлыгы гриппка каршы прививка ясатып үрнәк күрсәтте
Дүшәмбе көнне эш урынында Нурлат районы Башлыгы Дамир Ишкинеев гриппка каршы прививка ясатып, үз кулы астында эшләүчеләргә шәхси үрнәк күрсәтте.
Район Советы хезмәткәрләре янына килеп вакцинация ясауны Нурлат үзәк район хастаханәсенең күчмә бригадасы оештырды.
Дамир Ишкинеев вакытында вакцинацияләнүнең мөһимлеген ассызыклады.
"Прививка ясату - гриппның авыр барышыннан ышанычлы саклану ысулы ул. Ул авыруны җиңел формада үткәреп җибәрергә яки бөтенләй булдырмаска мөмкинлек бирә. Вакцинацияне никадәр күбрәк кеше ясатса, авыру дәрәҗәсе шулкадәр түбәнрәк булачак, бу коллективның күмәк эш көрлегенә дә, гомуми хезмәт җитештерүчәнлегенә дә уңай йогынты ясаячак", - диде ул. Район Башлыгы шулай ук ел саен гриппка каршы прививка ясатуын билгеләп үтте.
Җитәкче инициативасы кичекмәстән җавап тапты. Район башлыгы артыннан гриппка каршы прививкаларны аның урынбасары Иван Захаров, коррупциягә каршы көрәш буенча ярдәмчесе Рәфис Нигъмәтуллин һәм башкалар да ясатты.
Хезмәт коллективларына барып күчмә вакцинацияләүне оештыру Нурлат үзәк район хастаханәсенең системалы эшенең бер өлеше булып тора һәм бу эш киләчәктә дә дәвам итәчәк