Нурлатлылар «Татарлар: үз өемдә – үз көем» радиотапшыруының геройлары булды
Нурлатка эш визиты белән Башкарма комитет җитәкчесе урынбасары – Татарстан Республикасы бүлекчәләре белән эшләү комитеты җитәкчесе Ирек Шәрипов җитәкчелегендәге Бөтендөнья татар конгрессы вәкилләре килде.
Визит программасы бай булды. Аның төп максаты - җирле бүлекчә активистлары белән утырыш үткәрү һәм «Татарлар: үз өемдә – үз көем» радиотапшыруын яздыру. Әлеге проект Бөтендөнья татар конгрессы тарафыннан «Татарстан» дәүләт телерадиокомпаниясе белән берлектә гамәлгә ашырыла.
Визит кысаларында кунаклар Нурлат районы Башлыгы Дамир Азат улы Ишкинеев белән очраштылар. Программага биргән интервьюсында Дамир Азат улы республика тормышында районның урыны һәм әһәмияте, төрле тармакларның төп күрсәткечләре, социаль-икътисадый үсеш, демографик вәзгыять һәм киләчәккә планнар турында сөйләде.
Шулай ук Нурлатта милли мәгариф, халык мәдәнияте һәм дини тормыш мәсьәләләре яктыртылды. Үзләренең казанышлары турында районның социаль-мәдәни үсешенә зур өлеш кертүче активистлар сөйләде. Тапшыру «Радио России – Татарстан» каналында эфирга чыгачак.
"Без нинди генә юнәлешкә – дингә, мәгарифкә яки мәдәнияткә кагылсак та, Нурлат районында зур һәм нәтиҗәле эш алып барылуы күренеп тора. Анда өлкән буын вәкилләре дә, яшьләр дә катнаша. Махсус хәрби операция сугышчыларына ярдәмне аерым билгеләп үтәсе килә. Район халкына уңышлар телим һәм бу эш дәвамлы, нәтиҗәле булсын", - дип билгеләп үтте Бөтендөнья татар конгрессының мәгълүмат үзәге белгече Ләйлә Вәлиева.
Шәһәр Мәдәният сараенда Бөтендөнья татар конгрессы идарәсенең түгәрәк өстәл – утырышы узды.
"Безнең өчен милли җәмгыятьләр тормышында аның эшенә ниндидер яңалык кертә алырлык кешеләр катнашуы мөһим. Нурлат бүлегендә мәгариф, мәдәният, фән өлкәләре вәкилләре, дин әһелләре һәм район җитәкчелеге актив эшли. Шушы уртак тырышлык нәтиҗәсендә гражданлык җәмгыятенең милли-иҗтимагый оешма кебек мөһим институты үсә. Нурлат бүлекчәсен Әлфия Салих кызы Галәүтдинова җитәкли - ул иң тәҗрибәле һәм нәтиҗәле эшләүче җитәкчеләрнең берсе. Без монда сезнең тәҗрибәгезне өйрәнү өчен берничә тапкыр килдек һәм аны башка районнарга да күрсәттек, чөнки сездә үрнәк аларлык эшләр бик күп. Без моны бик югары бәялибез һәм аны тәҗрибә буларак уртаклашырга тырышабыз», – дип ассызыклады Ирек Шәрипов.
Утырыш барышында катнашучылар көнүзәк проблемалар турында фикер алыштылар һәм якын киләчәккә планнар билгеләделәр. Җирле бүлекчә үзәге булдыру, кинотеатрда татар фильмнарын күрсәтүне оештыру һәм башка инициативалар турында тәкъдимнәр яңгырады.
Чара азагында Бөтендөнья татар конгрессының җирле бүлекчәсенең актив әгъзаларын Рәхмәт хатлары белән бүләкләделәр.
«Ак калфак» татар хатын-кызлары оешмасының җирле бүлекчәсе җитәкчесе Гөлия Галәмова Әлфия Галәүтдиновага нәтиҗәле хезмәте һәм районда милли-мәдәни эшне оештыруы өчен рәхмәт белдерде, аны якынлашып килүче туган көне белән котлады һәм оешма әгъзалары исеменнән бүләк тапшырды.