Нурлат районы ветераны Татарстан Республикасы Рәисеннән бүләк алды
100 яшьлек Каим Сәмигуллин кунакларны күтәренке кәеф белән каршы алды.
Өлкәннәр ункөнлеге кысаларында Нурлат районы Башлыгы Дамир Ишкинеев Чулпан авылында яшәүче Бөек Ватан сугышы ветераны Каим Сәмигулла улы Сәмигуллин белән очрашты. Татарстан Республикасы Рәисе Рөстәм Миңнеханов исеменнән һәм шәхсән үз исеменнән Дамир Азат улы аңа бүләкләр тапшырды.
Каим Сәмигулла улы 100 яшьтән узган республиканың 294 кешесе исемлегенә керә. Өлкәннәр ункөнлеге кысаларында аларның барысына да Рөстәм Миңнеханов исеменнән бүләкләр тапшырачаклар. Нурлат районында шундый ике генә кеше яши.
Район Башлыгы ветеранга: "Сез безнең өчен батырлык һәм ныклык үрнәге булып торасыз. Сезгә күңел күтәренкелеге, ныклы сәламәтлек һәм иминлек телим",- дип мөрәҗәгать итте.
Дамир Ишкинеев шулай ук ветеран йортында күптән түгел ясалган капиталь ремонт нәтиҗәләре белән танышты. Эшләр нефть компанияләренең хәйрия ярдәме белән башкарылган. Төзелеш оешмасы өйне тулысынча үзгәрткән: идәннәр, тәрәзәләрне алыштырганнар, стеналар җылытканнар, яңа тарттырылган түшәм урнаштырылган һ.б. алга таба веранданы ремонтлау планлаштырыла.
Ветеран мондый үзгәрешләргә чын күңелдән шат һәм нефтьчеләргә һәм район җитәкчелегенә кайгыртулары өчен рәхмәтен белдерә. Олы яшьтә булуына карамастан, Каим Сәмигулла улы күтәренке рухта, җомга көннәрендә мәчеткә йөри, район, республика, ил яңалыклары белән актив кызыксына һәм бөтен җир йөзендә тынычлык урнашуын тели.